VAKWEZE
10: Kushishika
OMWO CHALUMBUNUKILA
Vatu vakushishika veji kuvafwelelanga chikuma kuli visemi javo, namasepa javo navakulwane javo vamilimo. Mwomwo veji kukavangizanga jishimbi, nakulama jishiko javo kaha veji kufwilanga kuhanjika muchano lwola lwosena.
OVYO CHAPWILA CHACHILEMU
Kakavulu mutu veji kumwitavisanga alinge vyuma mwasaka yivene mwomwo yakumufwelela hashimbu yayisuku.
“Nge muli nakusaka visemi jenu vamifwelelenga, kaha mwatela kulinganga vyuma vize navisolola nge mukwechi mangana amwenemwene numba nge muli ukawenu.”—Sarahi.
LUSHIMBI LWAMUMBIMBILIYA: “Lishishikenunga enu vavene mumone omu mwapwa.”—Wavaka-Kolinde 2, 13:5.
VYUMA MWATELA KULINGA
Nge muli nakusaka vamifwelelenga chikuma kaha vishina vinakavangizaho navimikafwa.
Hanjikenunga muchano. Vatu navamifwelelanga chikuma kachi nge namuhanjikanga muchano havyuma munalimbenje. Kuhanjikanga makuli chinahase kulingisa vatu vavavulu vahone kumifwelela.
“Chapwa chachashi kuhanjika muchano nge vyuma vili kanawa. Chipwe ngocho, kuhanjika muchano havyuma vize navilingisa vatu vamimone kupwa muvamokomoko, nachilingisa vatu vamifwelele chikuma.”—Caiman.
LUSHIMBI LWAMUMBIMBILIYA: “Tuli nakusaka ngwetu tupwenga vakashishi muvyuma vyosena.”—WavaHepeleu 13:18.
Pwenunga vakushishika. Kuhehwojola chimwe chize chapwile mulifuchi lyaU.S. vaka-kwingisa milimo vakuheta kujipaseti 78 vambile ngwavo, “kushishika chapwa chachilemu chikuma kumutu uze ali nakusaka vamwingise milimo.” Kachi nge namupwa vakushishika oholyapwa kaha nachikamikafwa kulutwe.
“Visemi jami vangufwelela chikuma mwomwo yakumona omu ngweji kuzatanga milimo yakuzuvo chakuzeneka vakiko kungwanukisa. Omu veji kungumonanga nguli nakuzata lwola lwosena cheji kuvalingisanga vangufwelele chikuma.”—Sarah.
LUSHIMBI LWAMUMBIMBILIYA: “Ngunafwelela vene ngwami nawononoka, . . . hakutachikiza ngwami naulinga kuhambakana nomu ngunakulweze.”—WaFwilemone 21.
Pwenunga namuchima wakutalilila chikoki. Chapwa chachashi vatu kumona chivuvu chamutu omu chili nakukola, oloze chasakiwa lwola numba vatu vatachikize kukula chamutu muvishinganyeka.
“Cheji kumbatanga lwola numba visemi jenu navatu veka vaputuke kumifwelela. Chipwe ngocho, vanahase kumifwelela nge namuzata nangolo mupwenga vakushishika.”—Brandon.
LUSHIMBI LWAMUMBIMBILIYA: ‘Vwalenu muchima wakutalilila chikoki.’—Wavaka-Kolose 3:12.
