Lizu kuzangamisa lyalumbununa kutwaminyina chipwe kunangula. Mwaliweza nawa kwolola vilinga vyamwana vyakuhenga. Kakavulu lyalumbununa nawa kulweza mwana mangana amwenemwene aze nawamukafwa asakule kanawa vyakulinga mukuyoya chenyi.

Mumyaka yino, visemi vamwe veji kuchiwananga kupwa chachikalu kuzangamisa vana vavo, mwomwo veji kushinganyekanga ngwavo chinahase kulingisa mwana ahone kulifwelela ivene. Chipwe ngocho, visemi vamwe veji kuhakanga jishimbi mutanga yavo nakukafwa vana vavo vajikavangizenga.

“Vana vasakiwa kuvakafwa vatachikize vyuma vatela kulinga navize kavatela kulingako mangana vakole kanawa. Nge visemi navahona kwololanga vishinganyeka vyavana vavo, kaha vana navasakula kulinga vyuma vyakuhenga vize navikavanehela ukalu kulutwe.”—Pamela.

Twalenuho lika. Nge mwanenu mwahona kukavangiza jishimbi namumuhana, kaha mulwezenu ukalu mwamona hakulikanga chenyi. Tuyokutuyoku nawa, sangejekenunga mwanenu nge ali nakukavangiza jishimbi jenu.

“Ngweji kusangejekanga vana vami hakwononoka chavo, numba tuhu tuli nakuyoyela mukaye muze munalisale vatu vakulikanga. Kusangejeka vana cheji kuvalingisanga vamivwilile nge munakuvolola.”—Christine.

LUSHIMBI LWAMUMBIMBILIYA: “Vyeshovyo ali nakukuva mutu, vikiko vene mwakaha nawa.”—Wavaka-Ngalesha 6:7.

Pwenunga vavavwovu. Nge muli nakuzangamisa mwanenu, kaha mwatela kushinganyeka myaka ali nayo, nauhashi atwama nawo, novyo vinamulingisa alimbenje. Ukalu weji kwizanga hakuhona kukavangiza jishimbi. Chakutalilaho, nge mwana mwahona kuzachisa shinga mujila yamwaza, kaha mwatela kumutambulayo hatando yayindende.

“Ngweji kuvangilanga kukekesa ngumone numba nge mwanami nasakula kulikanga chipwe nalimbenje kaha. Shikaho kulikanga chalihandununa nakulimbenja. Mwomwo kulimbenja chasakiwa kwolola mutu.”—Wendell.

LUSHIMBI LWAMUMBIMBILIYA: “Kanda namusowangizanga vana venuko, kuchina navahomba.”—Wavaka-Kolose 3:21.

Zangenunga vana venu. Nge vana navatachikiza ngwavo visemi javo vavazanga, kaha veji kuchiwananga kupwa chachashi kwitavila kuzangamisa chakufuma kuli visemi.

“Omu mwanetu walunga alimbenjele twamulwezele ngwetu, twevwile kuwaha chikuma havyuma vyamwaza asakwile kulinga kunyima. Twamukafwile chikuma atachikize nge kulimbenja chenyi kacheshi kuhasa kupihisa lijina lyenyiko nge mwalinga vyuma vyakwoloka, kaha twamulwezele nawa ngwetu natumukafwa alinge vyuma kana.”—Daniel.

LUSHIMBI LWAMUMBIMBILIYA: “Zangi yeji kutalililanga chikoki kaha nawa yeji kutetelanga.”—Wavaka-Kolinde 1, 13:4.