VAKWEZE
11: Kuzata Nangolo
OMWO CHALUMBUNUKILA
Vatu vaze veji kuzatanga nangolo kavalihenda kukuzata milimoko. Oloze veji kulivwisanga kuwaha kuzata nangolo mangana vawane vyakulikafwa navyo nakukafwa vakwavo, numba tuhu milimo vazata kayapwa yayilemu chikumako.
OVYO CHAPWILA CHACHILEMU
Kuhanjika muchano, kuyoya chasakiwa kuzata nangolo. Numba tuhu vatu vavavulu mukaye kavazanga kuzata nangoloko, oloze nge namuzata nangolo kaha nachimikafwa chikuma.—Muka-kwambulula 3:13.
“Ngunatachikiza jino ngwami kuzata nangolo cheji kulingisanga mutu apwenga wakusuuluka. Kusuuluka kana chinangukafwe nguzange kuzata nangolo. Shikaho kachi nge namuzatanga nangolo, kaha namupwa napuho yamwaza.”—Reyon.
LUSHIMBI LWAMUMBIMBILIYA: “Kuzata nangolo cheji kunganyalisanga.”—Vishimo 14:23.
VYUMA MWATELA KULINGA
Vyuma vinakavangizaho navimikafwa mumonenga milimo mujila yamwaza.
Zangenunga kulinangula mwakuzachila kanawa. Fwilenunga kuzata nangolo kala milimo muli nayo numba yipwa yakuzuvo, chipwe yakushikola, chipwe yakukaye. Omu namuzatanga milimo, wanenuko jila yimwe yize nayimikafwa muzatenga kanawa. Kachi nge namupwa nauhashi wakuzata milimo, kaha namulivwisanga kuwaha kuzata milimo yenu.
LUSHIMBI LWAMUMBIMBILIYA: “Kutala unamono mutu wauhashi kumilimo yenyi tahi? Mwakemana kumeso avamyangana, Keshi kukemana kuvatu vamokomokoko.”—Vishimo 22:29.
Shishikaho kanawa. Kakavulu nge mutu mwazata kanawa milimo yenyi, eji kunganyalisanga vakwavo. Chakutalilaho, nge mweji kuzatanga nangolo milimo yakukanda, kaha tanga yenu yeji kupwanga yakulihehwa.
LUSHIMBI LWAMUMBIMBILIYA: “Kuhana cheji kunehanga kuwahilila chikuma kuhambakana kutambula.”—Vilinga 20:35.
Zatenunga nakuhambakanyisaho. Zatenunga milimo nakuhambakanyisaho, keshi yize mweji kuzatanga lwola lwosenako. Nge namulinga ngocho, kaha namusuuluka mukuyoya chenu mwomwo munasakula enu vavene kuzata nangolo keshi kumishinjilako.—Mateu 5:41.
LUSHIMBI LWAMUMBIMBILIYA: “Cheshocho chuma chamwaza naungulingila chifume kumuchima wove keshi chakukushinjilako.”—WaFwilemone 14.
Pezalisenunga kanawa vyuma. Vatu vaze veji kuzatanga nangolo vapwa vasamalikita, chipwe ngocho veji kuwanangako nalwola lwakulinga vyuma vyeka vyamukuyoya. Veji kupezalisanga kanawa vyuma mangana valivwise kuwaha kuzata milimo nakuwanako lwola lwakunoka.
LUSHIMBI LWAMUMBIMBILIYA: “Kunokako chindende chinawahe kuhambakana kukilikita chikuma nakuhangasana peho.”—Muka-kwambulula 4:6.
Pamo Nauzanga Nawa
KAPOSHI KAKUTALILA
Vyuma Mwatela Kulinga Hakusaka Mulivwise Kuwaha Kuzata naNgolo
Talenu omu Mbimbiliya yinahase kumikafwa mupwenga vakuwahilila nakusuuluka hakuzata milimo yenu.
