Kulitomena vyakulinga kachapwa hichilota kahako, oloze chapwa kufwila kulinga vyuma vize navikasoloka kulutwe. Vyuma mwalitomena kulinga vyasakiwa kushinganyeka nakuzata nangolo.

Vyuma mwalitomena kulinga vinahase kupwa vyamakumbi amandende chipwe amavulu, vyeka vinahase kumbata myaka numba muvitesemo. Vyuma mwalitomena kulinga vize navimbata tando yayisuku vyasakiwa kuvitesamo chindende chindende.

Kutesamo vyuma mwalitomena kulinga nachimikafwa mulifwelele nakupwa nausepa wamwaza navakwenu, nakupwa vakuwahilila.

Kulifwelela: Nge namulitomena kulinga vyuma vize namutesamo hatando yayindende, kaha nachimikafwa mulitomene kulinga vyuma vize navisoloka kupwa vyavikalu kuvitesamo. Kaha nachimikafwa nawa mulifwelele nahalwola namuhita muukalu wakufwana nge kumishinyinyika mulinge vyuma vyavipi.

Usepa: Vatu veji kwivwanga kuwaha kulikata namasepa vaze vasaka kutesamo vyuma valitomenene kulinga, vaze vatachikiza vyuma vasaka, nakufwila kuzata nangolo mangana vavitesemo. Kakavulu nge munakusaka kutesamo vyuma mwasaka kaha mwatela kulikata namasepa vaze vafwila kukatesamo vyuma vyovimwe.

Kuwahilila: Nge namulitomena vyuma vimwe nakuvitesamo, kaha namupwa vakuwahilila chikuma.

Christopher ambile ngwenyi: “Ngwazanga kulitomena vyakulinga. Mwomwo vyeji kungukafwanga nguzate nangolo nakufwila kuvitesamo. Kaha nge munatesamo vyuma mwalitomenene nachimilingisa mupwenga vakuwahilila nakuhona kuliveya.”

LUSHIMBI LWAMUMBIMBILIYA: “Ou mwavandamina peho yihite nakutala mavwi keshi kukuva mbuto nakwahako.”—Muka-kwambulula 11:4, kweseka naMbimbiliya yaToday’s English Version.

Kavangizenu jijila jinakavangizaho mangana mutesemo vyuma mwalitomena kulinga.

Kuvitachikiza. Sonekenu vyuma vize muli nakusaka kutesamo, nakusakulaho vize navipwa vyatete kutesamo navize navikakavangizaho.

Kushinganyeka. Kala vyuma namusaka kutesamo, lingenu vyuma vino:

• Litomenenu lwola lwakuvitesamo.

• Kavangizenu vyuma navimikafwa muvitesemo.

• Shinganyekenu haukalu munahase kumona nomu munahase kuukumishilamo.

Kulinga. Kanda kuvandamina ngwenu, kuvanga mutachikize mashina namasongo avyuma munakufwila kutesamo numba muputuke kulinga vyuma kanako. Lihulisenu ngwenu, ‘chuma muka chatete ngwatela kulinga mangana ngutesemo vyuma ngwalitomena?’ Kaha fwilenu kulinga chuma kana. Kufumaho, kekesenu mumone numba nge munakufukila muchuma munakufwila kutesamo.

LUSHIMBI LWAMUMBIMBILIYA: “Vyuma veji kujinanga vaka-mangana vyeji kufukilanga.”—Vishimo 21:5.