Mutu walukakachila eji kupwanga lika wakumika chamokomoko nakala ukalu mwamona mukuyoya. Ukalu eji kuhitangamo mutu, ukiko weji kumukafwanga apwenga nalukakachila. Ngana muze mwana wamundende eji kulimbwojokanga hakulinangula kutambuka, mukiko namwanenu mwamonanga ukalu hakusaka afukile mukuyoya.

Vanyike vamwe veji kuhombanga nge vanahono kufukila muvyuma vimwe chipwe nge vali muukalu chipwe nge vali nakuvatoleka. Kaha vamwe veji kuzeyanga. Chipwe ngocho, vanyike vatela kutachikiza vyuma vino:

• Keshi lwola lwosena tunahase kufukila muvyuma natulingako.—WaYakova 3:2.

• Vatu vosena veji kumonanga ukalu mukuyoya chavo.—Muka-kwambulula 9:11.

• Kuhuhumuna cheji kukafwanga mutu alinangule kuvyuma nalimbenje.—Vishimo 9:9.

Kupwa nalukakachila nachikakafwa mwanenu akapwe wakumika omu mwakapwa muukalu

Kachi nge mwanenu nahono.

LUNDONGI LWAMUMBIMBILIYA: “Muka-kwoloka nahase kulimbuka mapapa 7 nakukatuka cheka.”—Vishimo 24:16.

Kafwenu mwanenu atachikizenga ukalu waunene nou waundende. Chakutalilaho, vyuma muka atela kulinga kachi nge nahono vyeseko kushikola? Nahase kuhanjika ngwenyi: “Vinangukaluhwila kaha kangweshi kukalinga kanawa muvyuma vyekako.”

Hakusaka mangana munangule mwanenu apwenga nalukakachila, mulwezenu kulinga vyuma vize navimukafwa akahase kumika. Nge namulinganga ngocho, kaha mwakumisanga kala ukalu mwamona nakuhona kuhomba.

Shikaho, lihendenunga kukulingilanga mwanenu vyuma vyosena. Oloze mukafwenunga awanenga jijila jakukumishilamo ukalu wenyi. Munahase kumuhulisa ngwenu: Vyuma muka watela kulinga mangana wivwishise vyuma uli nakulinangula?”

Kachi nge kunasoloka ukalu.

LUNDONGI LWAMUMBIMBILIYA: “Kamwatachikijile munachipwa kuyoya chenu hameneko.”—WaYakova 4:14.

Katweshi kuhasa kutachikiza omu nachikapwa kuyoya chetu kulutweko. Mutu nahase kupwa naluheto lelo oloze hamene mwapwa chihutu, kaha nawa mutu nahase  kupwa wakulikangula lelo oloze hamene mwaviza. Mbimbiliya yamba ngwayo: “Vaka-mbushi kaveshi kutapa vakwavo lwola lwosena mukulahako, vindume nawa kaveshi kufungulula jita lwola lwosenako . . . mwomwo lwola navyuma vyakwiza mukukasumuna vyeji kuvawananga vosena.”—Muka-kwambulula 9:11.

Visemi veji kukilikitanga nangolo javo josena mangana vakinge vana vavo kuponde. Oloze mwatela kutachikiza ngwenu kachapwa chachashi kukinga mwanenu kuvyuma vyosena vyavipi vinahase kumusolokela mukuyoya chenyiko.

Numba tuhu mwanenu kanda akole nakutachikiza ukalu weji kwizanga nge mutu vanamufumisa milimo chipwe nge jimbongo jakulikafwa najo jinakumu, oloze munahase kumukafwa atachikize vyuma atela kulinga nge kunasoloka ukalu wakufwana nge sepa lyenyi namwivwisa kupihya chipwe nge nafwisa kausoko. *

Kachi nge mwanenu vanamwolola havyuma vimwe.

LUNDONGI LWAMUMBIMBILIYA: “Ivwilila kumazu akukuhuhumuna . . . mangana ukapwe umuka-mangana kulutwe.”—Vishimo 19:20.

Kwolola mutu kachapwa kumuyanjisako, oloze yapwa jila yimwe yakumukafwilamo mangana alumuneko vilinga vimwe chipwe tato yayipi mukuyoya chenyi.

Kachi nge namunangula mwanenu mangana alingenga vyuma navamwolola kaha nachimikafwa muvosena muhone kumona ukalu. Chisemi umwe walijina lyaJohn ambile ngwenyi: “Kachi nge chisemi mwahakwilanga lika mwanenyi havyuma vyakuhenga mwalinganga, kaha mwana kana keshi kukatachikiza mwakukumishila ukaluko, kaha nawa mwakapwanga muukalu wauvulu. Nachilingisa nachisemi nawa akapwenga namulimo wakuunjisanga vikokojola nakufwetanga milonga mwavulumuna mwana.” Echi chinahase kulingisa mwana nachisemi vapwenga muukalu.”

Uno munahase kukafwa ngachilihi mwanenu mangana alingenga vyuma vanamwolola? Kachi nge mwanenu vanamwolola havyuma vimwe kushikola chipwe kala kwosena okwo apwanga, kamwatela kwamba ngwenu vatu kana valuwisanga hakwolola mwanenuko. Oloze munahase kuhulisa mwanenu vihula vyakufwana nge:

• “Chuma muka chavalingisanga vakwolole?”

• “Vyuma muka watela kulinga kachi nge vanakwolola?”

• “Vyuma muka mukalinga kachi nge chuma kana nachikasoloka cheka kulutwe?”

Tachikizenu ngwenu kachi nge mwanenu mwetavilanga kumwolola kaha nachimukafwa chikuma oholyapwa nakulutwe nawa omu mwakakola.