Ngana muze munamono, kukafwa chili mumangazini yino, chinapendamina haMbimbiliya. MuMbimbiliya mwatwama jindongi jize jinahase kukafwa mutu himutu mutanga apwenga navilinga vyamwaza. Jindongi jacho, jinahase kwalumuna vishinganyeka vyamutu nakumona vakwavo mujila yamwaza.—Vishimo 1:1-4.

MBIMBILIYA NAWA YAKUMBULULA VIHULA VYAVILEMU VYAMUKUYOYA VYAKUFWANA NGE:

• Uno kuyoya chalumbunukila mulihi?

• Uno twatela kuhana Kalunga mulonga haupi uli nakusoloka mukaye tahi?

• Vyuma muka vyeji kusolokanga kuli etu nge tunafu?

Tuli nakumilomba muwane omu Mbimbiliya yakumbulula vihula kanevi navihula vyeka. Talenu vindiyo yakwamba ngwavo Mwomwo Ika Twatela Kulinangwila Mbimbiliya? Yenu hakeyala ya www.pr418.com/lue.