3 Mwomwo Ika Vatu Vavilinga Vyamwaza Veji Kuyanjilanga?
Mwomwo Ika Chihula Kana Chapwila Chachilemu?
Chasoloka nge chapwa chakuhenga vatu vavilinga vyamwaza kuyanda. Kachi nge navatu vavilinga vyamwaza veji kuyandanga, kahanyi kufwila kupwa navilinga vyamwaza chapwa kulishina kaha.
Vyuma Mwatela Kushinganyekaho
Vatu vamwe vafwelela ngwavo, nge mutu nafu eji kusemukilanga muchuma cheka. Vafwelela nawa ngwavo vaze vapwilenga navilinga vyamwaza veji kusemukilanga muchuma cheka nakupwa nachiyoyelo chamwaza, kaha vaze valingilenga vilingi vyavipi veji kusemukilanga muchuma cheka nakumona luyando. Kweseka navyuma vafwelela, vamba ngwavo mutu wavilinga vyamwaza nahase kuyanda kachi nge alingilengako vyuma vimwe ‘vyavipi kunyima.’ Kachi nge . . .
-
Mutu uze eji kusemukilanga muchuma cheka keshi kwanuka chiyoyelo chenyi chakunyimako, kahaze numba mwayanda, vyuma muka mwawanaho?
-
Chiyoyelo chetu vachitongwela lyehi vyuma vyatela kukasoloka kweseka navyuma twalingile kunyima, kaha mwomwo ika tweji kuzachilanga nangolo hakusaka tupwenga namijimba yakulikangula, nakufwila kulikinga kujiponde?
LINANGULENU VYAVIVULU
Yenu ha jw.org mutale vindiyo yakwamba ngwavo, Mwomwo Ika Kalunga Etavishila Kuyanda?
Vyuma Yahanjika Mbimbiliya
Kachi nge vatu vali nakuyanda, kavatela kushinganyeka ngwavo Kalunga ikiye ali nakuvazangamisako.
Ukalu umwe veji kumonanga vatu shina mwomwo yakupwa kuchihela chimwe halwola lwakuhenga.
“Vaka-mbushi kaveshi kutapa vakwavo lwola lwosena mukulahako, vindume nawa kaveshi kufungulula jita lwola lwosenako, vaka-mangana nawa kaveshi kuwana vyakulya lwola lwosenako, vaze vazangama nawa kaveshi kuheta luheto lwola lwosenako, vaka-chinyingi nawa kaveshi kufukila lwola lwosenako. Mwomwo lwola navyuma vyakwiza mukukasumuna vyeji kuvawananga vosena.” —MUKA-KWAMBULULA 9:11.
Shili yize twaswana nayikiko yeji kutulingisanga tuyande.
Kakavulu vatu veji kuzachisanga lizu “shili” kutalisa kuvyuma vyavipi nalingi mutu. Mbimbiliya nayikiko yazachisa lizu kana hakulumbununa ukalu uze vaswana vatu vosena numba vapwa navilinga vyamwaza chipwe vyavipi.
“Ngwasemukile nakuhenga chami, ngwapwile nashili omu angwimichile mama.”—SAMU 51:5, Kwinyikila chamwishi.
Shili twaswana yaneha ukalu waunene kuvatu.
Shili yenyeka usoko wetu naKalunga, kaha nawa yeji kutulingisanga tuhone kutwama mukuunda navyuma vyosena vize vatenga. Echi jino chinanehe ukalu wanunene chikuma kuvatu vosena chamokomoko nokwo vatwama.
“Omu nangusaka kulinga vyuma vyakwoloka, vyuma vyavipi vikiko naviza muli ami.”—WAVAKA-LOMA 7:21.
“Vyuma vyakutenga vyosena vili nakulikemenena hamwe mikemo nakwivwila hamwe kukola.”—WAVAKA-LOMA 8:22.
