Vatu vavavulu kavasaka kulemesa Kalungako mwomwo vashinganyeka ngwavo ikiye eji kunehanga kuyanda.

Vatwamina vamukwitava vavavulu veji kunangulanga ngwavo Kalunga ikiye eji kunehanga kuyanda. Chakutalilaho, vamwe veji kuhanjikanga ngwavo:

• Kalunga eji kuzangamisanga vatu hakuvanehela ukalu wakulijila.

• Vana vavandende veji kufwanga mangana vakapwe vangelo mwilu.

• Kalunga eji kwazananga mujijita, kahechi cheji kunehanga kuyanda chachinene chikuma.

Kutala vyuma veji kunangulanga ava vatwamina vamukwitava kutalisa kuli Kalunga vyapwa vyamuchano tahi? Natutachikiza ngachilihi nge ava vatwamina vamukwitava Kalunga avakana lyehi?

Kalunga keshi ikiye eji kunehanga kuyandako.

Nge Kalunga ikiye eji kunehanga ukalu, kaha chuma kana nachilimbalaka navilinga vyenyi vasoneka muMbimbiliya. Chakutalilaho:

“Jijila [jaKalunga] josena jakwoloka. . . . Apwa wakwoloka, wakusungama.”—LUSHIMBI LWAMUCHIVALI 32:4.

“Nachipwa chakuhenga kuli Kalunga wamuchano kulinga vyuma vyavipi, chipwe ou Wangolo Josena kulinga vyuma vyakuhenga.”—YOPA 34:10.

“Ou Wangolo Josena keshi kuhasa kuhengesa chiyuloko.”—YOPA 34:12.

Kalunga ketavila mauka akwitava aze eji kunangulanga vyuma vyakuhenga hali ikiyeko.

Keshi kwitavila nawa mauka akwitava aze eji kunangulanga ngwawo Kalunga ikiye eji kunehanga kuyanda, nawaze eji kwazananga mujita namuvilinga vyeka vyaulyanyiko.

“Vapolofweto vali nakupolofweta vyuma vyamakuli mulijina lyayami [Kalunga]. Ami kangwavatumine, chipwe kuvalweza kulinga chuma numba chimwe, chipwe kuhanjika kuli vakikoko. Vali nakumilweza vyakumwenesa vyamakuli, . . . navyuma vyakutangisa vyamumichima yavo.”—YELEMIYA 14:14.

Yesu apopolwele kwitava chamakuli.

“Keshi nge vosena vaze vali nakwamba kuli ami ngwavo, ‘Ove Mwata, Ove Mwata,’ navakengila muWangana wameluko, shina vaze kaha vali nakulinga mwaya muchima waTata uze ali mwilu. Vavavulu navakamba kuli ami halikumbi lize ngwavo: ‘Ove Mwata, Ove Mwata, kutala katwapolofwetele mulijina lyove, nakulovola vandemone mulijina lyove, nakuzata milimo yangolo yayivulu mulijina lyoveko numba?’ Kaha hahaze vene nangukamba kuli vakiko ngwami: ‘Ami kangwamitachikizako! Fumenu kuli ami, enu vaka-kulinga upapwoki!’” —MATEU 7:21-23.