4 Uno Vatutengele Mangana Tuyandenga Tahi?
Mwomwo Ika Chihula Kana Chapwila Chachilemu?
Jila vakumbulwilamo chihula kana yapwa yayilemu kuli yetu.
Vyuma Mwatela Kushinganyekaho
Mwomwo ika Kalunga uze atengele vyuma vyosena vyahano hamavu etavishila kuyanda?
Vatu vaze kavetavako vamona kuyanda kupwa kanyinyilo kakupopolwelamo Kalunga nakwamba ngwavo katuzakamako, chipwe ngwavo kakwatwama Kalungako. Vatu kana vafwelela ngwavo kuyanda chasolola nge (1) Kalunga katwama nangolo jakufumisako kuyandako, (2) Kalunga kasaka kuchifumisako, chipwe ngwavo (3) kakwatwama Kalungako.
Uno evi vikiko kaha vyeji kulingisanga vatu vayande tahi?
LINANGULENU VYAVIVULU
Yenu ha jw.org mutale vindiyo yakwamba ngwavo, Uno Tunahase Kufwelela Ngachilihi Ngwetu Mbimbiliya Yapwa yaMuchano?
Vyuma Yahanjika Mbimbiliya
Kalunga katutengele mangana tuyandengako.
Asaka tulivwise kuwaha kuyoya.
“Kakweshi chuma chamwaza vatela kulinga vatu kuhambakana kuwahilila nakulinga vyamwaza shimbu vachili nakuyoyako. Kaha nawa vatu vosena vatela kulya nakunwa nakulivwisa kuwaha hamilimo yavo veji kukilikitanga. Chinapu wana wakufuma kuli Kalunga.”—MUKA-KWAMBULULA 3:12, 13.
Kalunga ahanyine vatu vatete vyuma vyosena vyasakiwile mukuyoya chavo mangana vahone kuyanda.
Kalunga kasakile vatu kana chipwe vana vavo vakayandeko.
“Kalunga . . . avambile ngwenyi: ‘Semenunga muvule chikuma, muzalise hamavu nakuwalamanga.’”—KUPUTUKA 1:28.
Vatu vatete valikangile kuli Kalunga.
Kulikanga chavo chavalingishile vayande chikuma, hamwe kaha navana vavo.
“Nge muze shili yengilile mukaye kuhichila muli mutu umwe nakufwa nawa kuhichila mushili, ngocho kufwa chatanda kuli vatu vosena mwomwo vosena valingile shili.”—WAVAKA-LOMA 5:12. *
Kalunga katutengele nauhashi wakulitwaminyina etu vaveneko.
Ngana muze kavatutengele mangana tutwamenga kwishi yameyako chochimwe nawa kavatutenga nauhashi wakuliyula etu vaveneko.
“Mutu katwama nangolo jakulitwaminyina iveneko.”—YELEMIYA 10:23.
Kalunga kasaka tuyandengako.
Kalunga asaka tutwamenga kanawa nakufwila kulihenda kuukalu.
“Kachi nge namwivwililanga jishimbi jami kaha kuunda chenu nachipwanga nge kalwiji.”—ISAYA 48:18.
^ par. 17 MuMbimbiliya lizu “shili” kalyatalisa kaha kuvilinga vyavipiko, oloze lyatalisa nawa nakukuhona kukupuka chize vaswana vatu vosena.
Pamo Nauzanga Nawa
KAPOSHI KAKUTALILA
Kalunga Eji Kwivwanga Ngachilihi haKuyanda Chenu?
Eji jivesi najimikafwa mutachikize omu eji kwivwanga Kalunga nge muli nakuyanda.
TONENU
Vyuma Yahanjika Mbimbiliya Kutalisa kuKuyanda
Uno Kalunga eji kutuzakamanga nge tuli muukalu tahi?
