vamona ngwavo kuyanda cheji kwizanga hali mutu mwomwo yavilinga vyenyi anakulinga makumbi ano, chipwe vize alingile kunyima. Kaha nawa vafwelela ngwavo kuyanda nachikakuma nge mutu nahete kuchihela vavuluka ngwavo moksha chize chalumbununa kusokoka kukufwa nakuhona kusemukila muchuma cheka.

vamona ngwavo kuyanda chapwa jila yakuzangamishilamo vaka-shili, kaha nawa yapwa jila yakwesekelamo lufwelelo. Ukalu weji kutulingisanga “tusakwilile Kalunga havyuma vyamwaza ali nakutulingila, kaha nawa twatela kufwila kukafwa vatu vaze vali nakuyanda.” Omu mukiko ahanjikile Ndotolo Sayyid Syeed uze apwa twamina wamukwitava chaIzilamu muNorth America.

vamona ngwavo kuyanda cheji kwizanga hali mutu mwomwo yavilinga vyenyi. VaYuleya vamwe vamba ngwavo nakukapwa kusanguka, kufumaho jino vaze vayanjile chakuzeneka mulonga navakavalingila mwaya chiyulo chakwoloka. VaYuleya veji kunangulanga ngwavo mutu eji kusemukilanga muchuma cheka, echi cheji kuhananga mutu lisesa lwakupihilila nakwalumuka kachi nge alingile shili.

vafwelela ngwavo mutu eji kuyandanga lika mukuyoya chenyi chosena, numba nge nasemukila muchuma cheka eji kutwalangaho lika kuyanda swi nomu vilinga vyenyi vyavipi, navyuma eji kushinganyekanga navyuma afwila navikakuma. Nge mutu mwapwa nachinyingi, nakuzata milimo yamwaza nakupwa namuchima wakulikanyisa kaha mwakaheta kunirvana, kuchihela kuze kakwatwama kuyandako.

Dictionary yaComparative Religion yavuluka ngwayo, vatu veji kuyandanga mwomwo “yakulimbenja chavo nakuhona chaviyulo.” Vaka-Confucianists vafwelela ngwavo numba tuhu kuyanda vanahase kuchikehesa kachi nge vatu navayoya kanawa, oloze vatachikiza ngwavo kuyanda veji kuchinehanga chikuma “kuvatu vakushipilitu vaze vatwama chikuma nangolo kuhambakana vatu. Ngocho, vatu vatela kaha kwitavila kala vyuma navalinga ava vatu vakushipilitu.”

vatu muvisemwa vimwe vafwelela ngwavo vaka-kupanda vakiko veji kunehanga kuyanda. Vatu kana vafwelela nawa ngwavo, vaka-kupanda veji kukisulanga mutu chipwe kumunehela ukalu, vatu vanahase kukehesako ukalu veji kunehanga vaka-kupanda, kachi nge navakavangiza vijila vyakulisezaseza vyamuvisemwa. Kachi nge mutu naviji kaha atela kuya kuvimbanda vakamuke numba ayoye.

vamona ngwavo kuyanda cheza mwomwo yashili valingile vatu vavali vakulivanga, ngana muze vasoneka muMbimbiliya mumukanda waKuputuka. Oloze mauka amavulu amukwitava eji kuhakilangako vyuma vyamuvishinganyeka vyavo. Chakutalilaho, vaka-Katolika vamwe veji kunangulanga ngwavo, nge mutu ali nakuyanda kaha kuyanda kana chinapu nge wana kuli Kalunga mangana Kalunga akisule chachi, chipwe mangana Kalunga azachise kuyanda kana alwile mutu weka.