Uno Chinyingi chaMakina Chakwata Ngachilihi Hakulinangula Chenu?
Chinyingi chamakina chili nakukafwa vatu valinangule vyavivulu vyakushikola chipwe vyakumilimo chipwe vyuma vyeka. Makumbi ano vatu vali nakulinangula vyuma vyavivulu oku vali hamembwavo kuhambakana muze chapwilenga kunyima.
Chipwe ngocho, vatu vaze veji kuzachisanga chikuma makina . . .
-
cheji kuvakaluhwilanga kuhaka mangana kuvyuma vali nakutanga.
-
vavula kutangukila kuvyuma vyeka.
-
veji kwivwanga washi uli nge vali ukawavo.
VYUMA MWATELA KUTACHIKIZA
HAKUTANGA
Vatu vamwe kavatanga mijimbu hamakina mumeso akuundako, mwomwo vasaka kaha kuwana vishina vali nakutonda.
Chapwa chamwaza kutanga liso haze liso haze nge uli nakusaka chuma chimwe muwashiwashi. Oloze kachapwa chamwazako nge uli nakusaka kwivwishisa kanawa chihande.
VYUMA MWATELA KUSHINGANYEKAHO: Kutala cheji kumyashiwilanga kutanga mijimbu yayisuku tahi? Uno kulinga ngocho nachimikafwa ngachilihi muhotole uhashi wenu wakulinangula?—VISHIMO 18:15.
HAKUTANGUKILA KUVYUMA VYEKA
Vamwe vashinganyeka ngwavo makina eji kuvakafwanga vazate milimo yayivulu. Chakutalilaho, veji kutanganga oku vali nakulisonekela mijimbu. Oloze echi nachivahonesa kulinga vyuma vyosena mukutamo, chikumanyi nge vyosena vinakusakiwa kuhakako mangana.
Numba tuhu kuhaka mangana kuvyuma chasakiwa kupwa namuchima wakulikanyisa, oloze chapwa chamwaza. Grace ambile ngwenyi: “Nachikukafwa uhone kulimbenjanga chikuma nakukehesako kuhomba. Ngunalinangula jino ngwami ngwatela kuhaka mangana kuchuma chimwe nakulihenda kuli vize vinahase kungutangula.”
VYUMA MWATELA KUSHINGANYEKAHO: Kutala makina eji kumihonesanga kuhaka mangana kuvyuma nakumihonesa kwanuka vyuma munalinangula tahi?—VISHIMO 17:24.
HAKUPWA UKAWENU
Vatu vamwe kavasaka kupwa ukawavoko, shikaho veji kuzachisanga makina mangana avandeko uli. Pwevo umwe walijina lyaOlivia ambile ngwenyi: “Ngweji kwivwanga uli nge nangutwama ukawami haminyutu 15 chakuzeneka kutala hashinga chipwe hatablet chipwe kutala TV.”
Olozenyi nge mutu ali kwaukawenyi numba apwa kanyike chipwe mukulwane, atela kuzachisa lwola kana mangana ashinganyeke havyuma nalinangula.
VYUMA MWATELA KUSHINGANYEKAHO: Kutala nge muli ukawenu, mweji kuzachisanga lwola kana mangana mushinganyeke tahi?—WACHIMOTEU 1, 4:15.
VYUMA MWATELA KULINGA
KEKESENU JILA MWEJI KUZACHISHILANGAMO MAKINA
Uno munahase kuzachisa ngachilihi makina mangana mulinangule vyuma vyamwaza? Makina anahase kumihonesa ngachilihi kuhaka mangana kuvyuma muli nakulinangula?
LUNDONGI LWAMUMBIMBILIYA: “Lamanga mangana amwenemwene nauhashi wakushinganyeka.”—VISHIMO 3:21.
Pamo Nauzanga Nawa
TONENU
Uno Mweji Kulivulishilanga Vyakulinga Tahi?
Vatu vavavulu veji kuchiwananga kupwa chachikalu kuwana lwola lwakuzata milimo yavo namilimo yeka yahembo. Vyuma muka vinakuneha ukalu kana? Vyuma muka twatela kulinga mangana tukeheseko ukalu kana?
