Chaluvinda, makina ali nakulingisa vatu vamwe mumalo . . .

• vahone kushikamanga hamwe.

• vanehe milimo hazuvo yize kayeshi nakusakiwako.

• vahone kulifwelela nakuhona kupwa vakushishika.

HAKUSHIKAMA

Michael uze ambata ambile ngwenyi: “Lwola lumwe puwami eji kunguliulanga nge tuli hamwe muzuvo, mwomwo eji kupwanga lika hashinga.” Jonathan nawa ahanjikile hachihande chochimwe ngwenyi: “Valunga napwevo vanahase kupwa muchihela chochimwe, oloze navevwa kwijiva nge vali kuvihela vyakulihandununa.”

VYUMA MWATELA KUSHINGANYEKAHO: Mapapa kangahi veji kumituminanga shinga chipwe mujimbu uze weji kumitangulanga muhone kushikama namuka-zuvo yenu?—WAVAKA-EFWESU 5:33.

HAMILIMO

Vatu vamwe vazata milimo yize yeji kulingisanga vavatumine shinga kala lwola. Veka kavazata milimo yakufwana nganako, oloze vanahase kuya nakuzachila milimo yimwe kuzuvo. Lee uze ambata ambile ngwenyi: “Cheji kungukaluhwilanga kutwama chakuhona kukumbulula shinga chipwe mujimbu vanangutumina kumilimo halwola luze ngwatela kushikama napuwami.” Kaha Joy ambile ngwenyi: “Ngweji kuzachilanga hembo, ngocho ngweji kuzatanga lwola lwosena. Chasakiwa kukilikita numba ngunoneke kanawa vyuma.”

VYUMA MWATELA KUSHINGANYEKAHO: Uno mweji kwivwililanga kanawa nge muka-zuvo yenu ali nakumihanjikisa tahi?—LUKA 8:18.

HAKUSHISHIKA

Kweseka nakuhehwojola chimwe, vawanyine nge Internet yili nakuneha ukalu mumalo. Vatu vamwe vaze vehwojwele vetavilile ngwavo veji kuswekelanga vaka-zuvo yavo mijimbu yimwe yize veji kutumanga haInternet.

Vatu vavavulu vetavila ngwavo Internet yapwa hichihela chaponde chikuma chize chinahase kulingisa mutu alinge ukoji. Evi vikiko vyalingisa mahako vajishimbi vaze vatala hamilonga yakulilukulula vambenga ngwavo Internet yikiko yili nakujiha malo amavulu.

VYUMA MWATELA KUSHINGANYEKAHO: Kutala mweji kuswekelanga muka-zuvo yenu vyuma mweji kushimutwilanga namutu wausonyi weka tahi?—VISHIMO 4:23.

LITOMENENU VYUMA VYAVILEMU VYAKULINGA

Mutu uze mwahona kulya, keshi kupwa wakulikangulako. Chochimwe nawa, mutu uze mwahona kushikamanga namuka-zuvo yenyi keshi kupwa naulo wakufukilako.—Wavaka-Efwesu 5:28, 29.

Shimutwilenu havishina vili mwishi namusaka kuzachisa, chipwe kusoneka vyenu enu vavene vize navihonesa makina kuneha ukalu muulo wenu.

• Fwilenu kulilanga hamwe vyakulya numba vene kamwe halikumbi

• Livwasanenu lwola luze kamwatela kuzachisa makinako

• Nonekenu lwola lwakuya hamwe nakulivwisa kuwaha

• Jimenu jishinga naufuku nakujitumbika hahasuku nakahela

• Shimutwilenunga haminyutu 15 hakumbi hakumbi chakuzeneka kukwata makina

• Nonekenu lwola lwakujima Internet