Uno Chinyingi chaMakina Chakwata Ngachilihi haUsepa Wenu naVakwenu?
Makumbi ano vatu veji kulituminanga mijimbu yahashinga chipwe kulisonekela jiemail, nakuya haInternet chipwe kuhanjika navakwavo halikina oku vali nakulimona, numba tuhu vali kwakusuku. Vatu kana veji kuzachisanga chinyingi chamakina mujila yamwaza.
Chipwe ngocho vatu vaze veji kuzachisanga makina hakushimutwila namasepa . . .
-
kavevwila keke masepa javoko.
-
veji kwivwanga chikuma uli.
-
kavahaka mangana vakwavoko.
VYUMA MWATELA KUTACHIKIZA
HAKEKE
Hakusaka twivwile vakwetu keke twatela kushinganyeka havyuma vali nakuhitamo. Oloze tunahase kumona ngwetu chuma kana chachikalu mwomwo yakuhaka chikuma mangana kukuya haInternet nakukulitumina mijimbu hamakina.
Mukuhita chalwola, nge mijimbu mwatela kukumbulula yinavulu, munahase kushinganyeka ngwenu kukumbulula masepa jenu hichiteli. Ngocho munahase kufwila kuvakumbulula kaha vamifume muchishishisa chakuvakafwa nge vali muukalu.
VYUMA MWATELA KUSHINGANYEKAHO: Namutwalaho ngachilihi ‘kuzakama vakwenu’ nge muli nakushimutwila navo hamakina?—WAPETULU 1, 3:8.
HAKWIVWA ULI
Kweseka nakuhehwojola chimwe, vawanyine ngwavo vatu vavavulu veji kwivwanga uli nge vanashimbula haInternet. Ava vaka-kuhehwojola vahanjikile ngwavo vaze veji kutalatalanga jifwato namijimbu yeka yize vanahake vakwavo haInternet, ‘veji kumonanga ngwavo vanenyeka lwola lwavo.’
Kaha nawa kutalatala jifwato jamwaza jize vanahake vakwenu haInternet chinahase kumilingisa mulyesekese kuli vakiko nakulimona ngwenu muvakusalila. Munahase kushinganyeka nawa ngwenu vali nakulivwisa kuwaha kuyoya kuhambakana yenu.
VYUMA MWATELA KUSHINGANYEKAHO: Namulihenda ngachilihi kukulyesekesa kuli vakwenu nge muli haInternet?—WAVAKA-NGALESHA 6:4.
HAKUHONA KUHAKA MANGANA VAKWENU
Mulongeshi umwe ambile ngwenyi vaka-shikola jenyi vamwe vasaka kulikwata usepa navaze navavalingila vyuma vyamwaza. Mutu nahase kumona masepa jenyi nge hishinga yize nahase kuzachisa nakuyiliula hosena oho nasakila.
VYUMA MWATELA KUSHINGANYEKAHO: Uno vyuma mweji kuhakanga haInternet vyasolola nge mwatwama namuchima wakulipecha navakwenu chipwe kuhona kuvahaka mangana tahi?—WAVAKA-NGALESHA 5:26.
VYUMA MWATELA KULINGA
KEKESENU JILA MWEJI KUZACHISHILANGAMO MAKINA
Nge namuzachisanga makina mujila yamwaza, kaha namushimutwilanga kanawa namasepa jenu nakuzamisa usepa wenu.
LUNDONGI LWAMUMBIMBILIYA: “Zangi . . . kayeshi kufwila vyuma vyayo yiveneko.”—WAVAKA-KOLINDE 1, 13:4, 5.
Sakulenu vyuma munahase kulinga, chipwe kusoneka ovyo munasake enu vavene.
-
Hanjikenunga navatu (muchishishisa chakuvasonekela mijimbu hashinga chipwe haemail)
-
Kanda kuzachisanga shingako (chipwe fumisenungako chivumo) nge muli nakushimutwila navakwenu
-
Kehesenuko lwola lwakupwanga haInternet
-
Ivwililenunga kanawa nge vakwenu vali nakuhanjika
-
Tuminenunga shinga sepa lyenu uze ali muukalu chipwe kuya nakumutala
Reported in the book Reclaiming Conversation.
