MUNO mukaye muli malimi amavulu akuheta ku 7,000, ngocho kuvula kanechi chinanehe ukalu mukutambwojoka, nakusekasana, nakutanga mashikola, namujifulumende. Ukalu kanou unapungako lika putu vene kushikulu. Chakutalilaho, kafwe mumwaka wa 475 B.C.E muchiyulo chaMwangana Ahaswelu, (pamo apwile mwangana Seleke I) vaPeleja vatumine mikanda yajishimbi mujingalila “127 kufuma kuIndiya swi nakuEchopa. Kungalila hingalila vatumineko mukanda kweseka nomu vasonekela vasona javo, kaha vatu vosena vavasonekelele mumalimi avo.” *

Makumbi ano, mauka amavulu chipwe jifulumende kavyeshi kuhasa kweseka kuzata mulimo kanou waukalu nganako. Oloze kuliko liuka limwe lize linakuzata mulimo kana. Vinjiho jaYehova vali nakusonekanga jimangazini, namikanda yayivulu, namazu akukopa, najivindiyo, kuhakilako vene naMbimbiliya. Vyosenevi vili mumalimi akuhambakana 750. Hamalimi kana hali namalimi atuveveve akuheta ku 80. Vinjiho vali nakupulita nawa mikanda yaVasona vaTupuputa.

Vinjiho jaYehova kavanganyalilaho jimbongo hamulimo kanouko. Kaha nawa vatu vaze veji kwalumunanga mikanda yavo namilimo yeka, valisuula kuzata milimo kana hawana wakanyombo. Mwomwo ika veji kuzachilanga mulimo wakwalumuna mikanda mumalimi amavulu, kaha veji kuuzatanga ngachilihi?