VATU vavavulu kulya vachizanga. Oloze vamwe veji kumonanga vyakulya vimwe kwijiva nge “himuka-kole wavo.” Ngana mwaEmily uze tunavuluka lyehi, vatu vamwe veji kuvizanga mwomwo yavyakulya vimwe. Musongo apwilenga nawo Emily uze wejilenga mwomwo yavyakulya vimwe vauvuluka ngwavo anaphylaxis. Musongo kana waupi chikuma. Oloze misongo yimwe yize yeji kwizanga mwomwo yakulya chimwe kayapwa yayinene chikumako.

Mumyaka yakalinwomu, vatu vavavulu vanavijinga mwomwo yavyakulya vimwe vize vinahase kuvijisa vatu nakuvanehela ukalu. Vaka-kuhehwojola vamwe vanambe ngwavo vatu vavandende kaha vakiko vanawane namisongo mwomwo yavyakulya vimwe.

Vaka-sayasi vaze vatwaminyinyine kuli Ndotolo Jennifer J. Schneider Chafen vasonekele mumukanda waThe Journal of the American Medical Association ngwavo: “Kakweshi kulya chize vetavila vatu vosena ngwavo chikiko cheji kuvijisanga vatuko.” Oloze vakuluwa vavavulu vaze valinangula muvyuma kana vetavila ngwavo kakavulu misongo veji kuvizanga vatu mwomwo yakulya chimwe yeji kwizanga mwomwo yavyuma vyamumujimba vize vyeji kukinganga vatu kumisongo.

Muvyakulya vimwe vize mwalya mutu mwatwama vyuma vavuluka ngwavo protein yize yinahase kuvijisa mutu. Vyuma vyamumujimba vize vyeji kukinganga vatu kumisongo vyeji kusolola unjiho wakuhenga wakwamba nge protein kana yayipi kumujimba. Nge protein yayipi yinengila mumujimba, vyuma vyakukinga mujimba kumisongo vyeji kutunganga vyuma vimwe vavuluka ngwavo Immunoglobulin E mangana vifwomone protein kana. Nge mutu nali cheka vyakulya vize vinahase kumuvijisa, kaha vyuma vize vavuluka ngwavo Immunoglobulin E vyeji kulovolanga vyuma vyeka vavuluka ngwavo histamine.

Kakavulu histamine yeji kukafwanga vyuma vyakukinga mujimba kumisongo. Oloze kuli vyuma vimwe vize vatu kavatachikiza kanawako, vize vyeji kulingisanga Immunoglobulin E yinehe histamine yize nayivijisa mutu mwalya vyakulya vize vili naprotein.

Echi chikiko cheji kulingisanga mutu ahone kuviza halwola lwatete mwalya vyakulya vimwe, oloze lwola lukwavo mwakalya vyakulya kana himwakaviza.

Kulya chize nachineha ukalu chinalifwane nachize nachivijisa mutu, pamo mwomwo yavyuma vize vili mukulya chize mwalya mutu vikiko vinahase kumuvijisa chikuma. Kulya kana chalihandununa nakulya chize nachivijisa mutu. Mutu nahase kupwa naukalu havyakulya vimwe mwomwo  vyakulya kana kavyeshi kuchikika mujimoko, kaha vyuma vize vyeji kutukinganga kumisongo kavyeshi kuzata halwola kanako. Kakavulu vyakulya vize mwalya mutu vinahase kukaluhwa kuchikika mwomwo yakukeha chajingolo javyuma vavuluka ngwavo enzymes, chipwe mwomwo yavyuma vyatwama muvyakulya vize vyeji kukaluhwanga kuchikika. Chakutalilaho, nge mijingwa nayihona kuneha vyuma vavuluka ngwavo enzymes vize vyeji kuchikanga shuka yatwama muvyakulya vize vikwechi mavele, kaha vyuma vize mwalya mutu kavyeshi kuchikikako.

Hakuwana nge vyuma vize vyeji kutukinganga kumisongo kavyeshi kuzata halwola navilichika vyakulyako, mutu nahase kuviza hahaze vene mwalya vyakulya vize kavyalitele namujimba wenyiko. Kakavulu mutu nge mwalya vyakulya vyavindende, keshi kuvizako oloze nge mwalya vyavivulu kaha nahase kuviza. Echi chalihandununa navyakulya vize vyeji kuvijisanga, mwomwo mutu nahase kuviza numba vene nge nali tuvyakulya twatundende.

Nge vyakulya vimwe vyeji kumivijisanga, kaha mweji kwivwanga kuzwa, nakuvwambuka vimbulu, nakujimba kumiliu nakumeso, nalilimi; nakuzemba kumuchima, nakusaza chipwe kuhichisa. Kaha lwola lumwe mutu nahase kupwa namusongo wamuchima, nachiseta, nakulezumuka namuchima kwecha kuzata. Ukalu kana unahase kutohwa mukapyapya kakandende, kaha unahase kujiha mutu.

Vyakulya vyosena vinahase kuvijisa. Oloze vyakulya vino vikiko vyeji kuvijisanga chikuma vatu: mavele, maulu, vaishi, masenda vamukalungalwiji, vyelu, makunde, mikau natiliku. Vyakulya kana vinahase kuvijisa kala mutu chamokomoko namyaka ali nayo. Vaka-kulinangula vamba ngwavo nge visemi navapwa naukalu wakulya vyakulya vimwe, kaha navana vavo navakiko vanahase kukapwa naukalu kana. Vanyike vavavulu nge vanakolo veji kulyanga navyakulya vize vyavavijishilenga kunyima chakuzeneka kumona ukalu.

Kulya chize cheji kuvijisanga cheji kunehanga misongo yayinene kuhambakana kulya chize cheji kunehanga kaha ukalu. Kulya kana cheji kunehanga ukalu wakufwana nge kuviza mujimo, namazuza, namahilichi, nakuviza mutwe, nakuvwambuka vimbulu, nakuzeya, nakwivwa kumuchima wi. Kulya chakuneha ukalu chinahase kufuma kuvyakulya vyakufwana nge mavele, tiliku, nakulya chikwechi vihwahwa, nawala nakulya chikwechi chimbalwila.

Nge munamono ngwenu kulya chimwe cheji kumivijisanga, kaha mwatela kuya kuchipatela. Chapwa chachipi kulitwamina kulya vyakulya vimwe chakuzeneka kumilweza kuli ndotolo kulinga ngocho, mwomwo vyakulya vimwe vyapwa vyavilemu kumijimba yenu.

Kakavulu kakwatwama vitumbo vyakuka vatu vaze veji kuvizanga mwomwo yakulya vyakulya vimweko, chachinene shina kulitwamina vyakulya vize vyeji kuvavijisanga. * Tuyokutuyoku nawa, nge vyakulya vimwe kavyeshi kumivijisa chikumako chipwe kuminehela ukalu wauneneko, kaha munahase kukehesako kulya vyakulya kana. Lwola lumwe, vatu vaze veji kuvizanga mwomwo yavyakulya vimwe, veji kulitwaminanga kulya vyakulya kana chipwe kulitwamina kuvilya hakatando kamwe chikalu kaha nge kavyeshi nakuvavijisa chekako.

Nge vyakulya vimwe vyeji kumivijisanga chipwe nge vyeji kuminehelanga ukalu, kaha tachikizenu ngwenu vakwenu vamwe vaze vatwama naukalu kanou vatachikiza mwakulipikila nawo, kaha nawa veji kulivwisanga kuwaha kulya vyakulya vyeka vyamwaza vyakutunga mujimba.