VYUMA VEJI KUHANJIKANGA VATU VAMWE

Vatu vavavulu vashinganyeka ngwavo mutu akwechi lufwelelo eji kwitavilanga kala vyuma chakuzeneka kutachikiza unjiho wamuchano havyuma kana. Chakutalilaho, achishinganyekenu hali muka-kwitava uze mwahanjika ngwenyi, “Ngwafwelela muli Kalunga.” Kachi nge namuhulisa mutu kana ngwenu, “Mwomwo ika wapwila umuka-kufwelela?” Nahase kukumbulula ngwenyi, “Mwomwo ngwasemukila mukwitava” chipwe ngwenyi, “Mwomwo mukiko vangunangula kufuma kuunyike.” Nge mutu mwakumbulula ngocho, kaha katachikiza chihandwa chatwama hakupwa nalufwelelo nakupwa chipumbu mwitavilako.

VYUMA YAHANJIKA MBIMBILIYA

“Lufwelelo lwapwa kuvandamina namuchima wakukunyuka vyuma vize twatalilila, hiunjiho wakusolola hatoma vyuma vivene vize katwamweneko.” (WavaHepeleu 11:1) Hakusaka mutu akunyuke ngwenyi vyuma ali nakuvandamina vyamuchano, atela kupwa naunjiho wamwenemwene havyuma ali nakutalilila. Lizu lyachiHelase valumuna ngwavo “kuvandamina namuchima wakukunyuka” kalyalumbununa kaha omu tweji kwivwanga havyuma twatalilila chipwe kushinganyeka chikuma havyuma kanako. Ngocho kupwa nalufwelelo chasakiwa nawa kutachikiza unjiho wamwenemwene uze nautukunyula.

“Vilinga [vyaKalunga] evi vahona kumona, nangolo jenyi jahaya myaka yosena nauKalunga wenyi, vyasoloka hatoma kufuma vene kukutenga chakaye nakuya kulutwe, mwomwo vavimwena kuvyuma atenga.”—Wavaka-Loma 1:20.

VYUMA YAHANJIKA MBIMBILIYA

“Chakuzeneka lufwelelo, chachikalu kumwivwisa Kalunga kuwaha, mwomwo weshowo mwapandama kuli Kalunga, atela kwitavila ngwenyi kwatwama, kaha nawa ngwenyi ikiye apwa muka-kufweta vaze vali nakumutondatonda chikuma.”—WavaHepeleu 11:6.

Ngana muze twavulukanga hakavanga, vatu vavavulu vafwelela muli Kalunga mwomwo mukiko vavanangula. Vanahase kwamba ngwavo, ‘Mwomwo ngwasemukila mukwitava.’ Oloze Kalunga asaka vatu vaze veji kumulemesanga vatachikize ngwavo chikupu vene kwatwama kaha nawa akwechi zangi. Echi chikiko chalingisa Mbimbiliya yitulweze ngwayo twatela kumutondatonda namuchima wetu wosena mangana tumutachikize kanawa.

“Pandamenu kuli Kalunga, kaha mwapandama kuli enu.”—WaYakova 4:8.

VYUMA YAHANJIKA MBIMBILIYA

Mbimbiliya yamba ngwayo: “Lufwelelo lweji kwizanga havyuma nevu mutu.” (Wavaka-Loma 10:17) Chuma chachinene chinahase kutukafwa tupwenga nalufwelelo muli Kalunga shina, ‘kwivwa’ vyuma yanangula Mbimbiliya hali ikiye. (WaChimoteu 2, 3:16) Kulinangula Mbimbiliya nachimikafwa muwane muvakumbulwila vihula vyavilemu vyakufwana nge vino: Kalunga ikiye iya? Vyuma muka vyasolola nge kwatwama? Uno Kalunga anguzakama tahi? Vyuma muka ajina Kalunga kukalinga kulutwe?

Vinjiho jaYehova navawahilila chikuma kumikafwa mulinangule Mbimbiliya. Nganomu vasolola hakeyala yetu ya jw.org, “Vinjiho jaYehova vafwila kunangula vatu Mbimbiliya, oloze katwashinjila vatu vezenga mukwitava chetuko. Tweji kuvalwezanga vyuma yanangula Mbimbiliya mwomwo twatachikiza ngwetu mutu himutu akwechi lisesa lyakulisakwila ivene vyuma atela kufwelela.”

Kutwala muze, lufwelelo lwenu lwatela kupendamina havyuma namumona nakuvyesekesa kuvyuma namutanga muMbimbiliya. Nge namulinga ngocho kaha namukavangiza chakutalilaho chavaka-kulinangula Mbimbiliya vamulikulukaji lyamyaka lyakulivanga vaze ‘vetavilile mazu namuchima wakwanguhwa, kaha vakekeselenga kanawa Visoneka hakumbi hakumbi mangana vamone numba nge vyuma kana muvyaya vene ngana.’—Vilinga 17:11.

“Echi chikiko kuyoya chahaya myaka yosena, kukutachikiza ove Kalunga umwe kaha wamuchano, nayou nawa watumine, Yesu Kulishitu.”—Yowano 17:3.