VAMANJIMELA veji kulikomokelanga chikuma hauhashi atwama nawo kazenene wakuzundula vyuma vyavilemu chikuma kuhambakana pezu yamujimba wenyi. Hakusaka vatachikize uhashi kanou, vamanjimela vahaYunivesiti yamuOhio State, muU.S.A., valinangwile vilyo vyamujimba wakazenene kuzachisa jipolongalamu vatungile hakopyuta (computer models) mangana vamone omu vyazata vilyo vyenyi nakuhunanana hamujimba wenyi, nangolo atwama najo. Jipolongalamu kaneji vajitungile kuzachisa vyuma vavuluka ngwavo X-ray cross-sectional images navyuma vize vyalondezeza ngolo eji kuzachisanga kazenene hakumbata vyuma.

Chilyo chachilemu chikuma chize atwama nacho kazenene shina shingo yenyi, yize yeji kumukafwanga ambate vyuma vyavilemu chikuma kukanwa kenyi. Nyama yahashingo yenyi yalikasakasa namujimba wenyi, kaha mutwe wenyi nawa wengila muchikutungulu chamujimba wenyi nakulisepasana ngana muze mutu mwasepasana minwe yamavoko enyi. Muka-kuhehwojola umwe amba ngwenyi, “echi kulikasakasa chanyama yakazenene nakulisepasana chamujimba wenyi cheji kujikijisanga chikuma manungililo ashingo yenyi. Echi kulisepasana chakulipwila chikiko pamo cheji kuhananga ngolo manungililo ashingo yakazenene mangana ambate vyuma vyavilemu chikuma.” Vaka-kuhehwojola vamba ngwavo nge navatachikiza kanawa omu yazata shingo yakazenene, kaha nachivakafwa vatunge makina aze veji kulwezanga vyakulinga.

Enu munashinganyeka ngachilihi? Uno shingo yakazenene yize yazata mujila yakukomwesa yalijilile ivene tahi nyi valingile yakutenga?