TUNYAMA vavavulu vaze vatwama mumeya vatwama nachilanda chamaji chize cheji kuvakafwanga vevwanga kuzuma. Oloze ou kanyama atwama nachilanda chamangona chize cheji kumukafwanga evwanga kuzuma.

Achishinganyekenu hachumechi: Mangona ayou kanyama kawengisa meya hamujimba wenyi nganomu vapwa tunyama vakwavoko. Omu eji kuhalanga ou kanyama, mumangona enyi mweji kwingilanga peho. Kaha peho kana yikiko yeji kuhonesanga meya kuheta hamujimba wenyi nakumulingisa jino evwenga kuzuma.

Vaka-sayasi vanahase kulinangula vyuma vyavivulu kumangona ayou kanyama. Vanatungu uvwalo wamangona wauvulu, umwe wamangona amasuku, kaha weka wamangona akuhona kulijika. Vaka-kuhehwojola vanakukulula ngwavo, nge mangona nawasuhwa, kaha nawahonesa meya kuheta hachikova. Mujila yikwavo, kanyama kana akwechi chilanda chamangona amavulu.

Vaka-kuhehwojola vashinganyeka ngwavo kuhehwojola chavo chinahase kuvakafwa vawane mwakutungila uvwalo chipwe vyuma vize navihonesa kwingisa meya. Echi chinalingisa vatu vamwe vashinganyeke ngwavo vaka-kujiminyina mumeya vatela kuvwalanga uvwalo uli namangona ngana aze atwama nawo ou kanyama.

Munashinganyeka ngachilihi? Uno mangona ambau wamukalungalwiji alijilile avene tahi? Nyi valingile akutenga?