KUTALA mwafwelela ngwenu Mbimbiliya yafuma kuli Kalunga tahi? Nyi mwashinganyeka ngwenu yazala kaha navishinganyeka vyavatu?

Vatu vaze valivuluka kupwa vaka-Kulishitu navakiko veji kuhuhwasananga hachihande kana. Chakutalilaho, kweseka nakulava chimwe chapwile muUnited States mu 2014, vawanyine nge vatu vavavulu vaze valivuluka kupwa vaka-Kulishitu vetavila ngwavo, “Mbimbiliya yahanjika vyuma vimwe kutalisa kuli Kalunga.” Vawanyine nawa nge vatu vavandende kaha vakiko vafwelela ngwavo, Mbimbiliya yapwa himukanda “ukwechi mijimbu yakutaka kaha, wakushikulu, kaha nawa ukwechi jishimbi jize vasonekele kuli vatu.” Vyuma kanevi vyasolola ulumbunwiso walizu ‘vayihwima’ lize lyatalisa kuMbimbiliya.—WaChimoteu 2, 3:16.

MuMbimbiliya mwatwama mikanda yayindende 66, yize vasonekele kuli malunga 40 hamyaka yakuzomboka 1,600. Vatu vamwe vanahase kuhulisa ngwavo, nge Mbimbiliya vayisonekele kuli vatu, kaha ‘vayihwima ngachilihi kuli Kalunga’? Mazu akwamba ngwavo ‘vayihwima kuli Kalunga’ alumbununa nge Kalunga ikiye mwenya mazu aze atwama muMbimbiliya. Mbimbiliya yamba ngwayo: “Vatu vahanjikile vyakuli Kalunga omu vavatwaminyinyine nashipilitu yajila.” (WaPetulu 2, 1:21) Echi chalumbununa nge, Kalunga azachishile shipilitu yajila, yize yapwa ngolo jenyi jize katwamona namesoko mangana yitwaminyine vaka-kusoneka Mbimbiliya. Echi chapwa nge muze kaka yamutu mwalweza muzukulyenyi amusonekeleko mukanda. Uno mwenya mukanda kana iya? Naupwa wakaka yamutu, keshi wamuzukulyenyiko.

Vaka-kusoneka Mbimbiliya vamwe vevwilenga mazu avalwezelenga Kalunga kuhichila muli kangelo. Kaha veka vavamweneselenga vyakumwenesa kuli Kalunga. Shimbu jimwe, Kalunga avalwezelenga mazu enyi kuzachisa vilota. Kaha nawa Kalunga etavishile vaka-kusoneka vazachise mazu avo hakusoneka Mbimbiliya, oloze shimbu jimwe nawa avalwezelenga mazu akusoneka. Kala mweshomwo chapwile ava vaka-kusoneka Mbimbiliya vasonekele vishinganyeka vyaKalunga keshi vishinganyeka vyavoko.

Vyuma muka vinahase kutukunyula tufwelele ngwetu Kalunga ikiye ahwiminyinyine vatu vaze vasonekele Mbimbiliya? Tushimutwilenu jino unjiho utatu uze wasolola chikupu nge Mbimbiliya yafuma kuli Kalunga.