VYUMA YAHANJIKA MBIMBILIYA

Shimbu kanda Kalunga atenge melu namavu, nalunga napwevo vakulivanga, avangililile kutenga vangelo vaze vatwama namangana kuhambakana vatu. Kaha nawa vangelo vatwama nangolo kuhambakana vatu, vatwama kuchihela kuze atwama Kalunga, chihela chize vatu kavamona namesoko. (Yopa 38:4, 7) Mbimbiliya yavuluka ava “vangelo” ngwavo vapwa “vatu vakushipilitu.”—Samu 104:4. *

Uno vangelo vapwa vangahi? Vapwa mayongomena amavulu. Vangelo vaze vatwama kulitanda lyaKalunga vapwa “mayongomena namayongomena,” chipwe “tununu natununu twatununu natununu.” (Kusoloka 5:11; kwinyikila chamwishi) Tunahase kwamba nawa ngwetu vapwa makulukaji ajimiliyoni.

“Ngwamwene . . . vangelo vavavulu vanajinguluka kulitanda . . . , kuvula chavo vapwile mayongomena namayongomena namakombakaji namakombakaji.”—Kusoloka 5:11.

VYUMA YAHANJIKA MBIMBILIYA

Kakavulu vangelo vapwile vaka-kuhanjikilako Kalunga chipwe ngwetu miluwa jenyi. * Mbimbiliya yahanjika nawa ngwayo vazachilenga mulimo waKalunga wakukomwesa. Kalunga atumine kangelo kwiza nakukisula Apalahama nakumukanyisa kujiha mwanenyi Isaka. (Kuputuka 22:11-18) Kaha nawa kangelo asolokele kuli Mose mumulangi wakakahya uze wapwile mukachi kachiputa nakumulweza mujimbu waulwilo. (Kulovoka 3:1, 2) Omu kapolofweto Ndanyele vamumbilile muwina wavandumba, ‘Kalunga atumine kangelo kenyi, kaha asokele kutunwa twavandumba.’—Ndanyele 6:22.

“Kangelo kaYehova asolokele kuli ikiye mumulangi wakakahya uze wapwile mukachi kachiputa chamingonga.”—Kulovoka 3:2.

VYUMA YAHANJIKA MBIMBILIYA

Katweshi kuhasa kutachikiza milimo yosena yize vangelo vali nakuzata makumbi anoko. Oloze Mbimbiliya yasolola nge navangelo vali nakukafwa vatu vamichima yamwaza vatachikize vyavivulu hali Kalunga.—Vilinga 8:26-35; 10:1-22; Kusoloka 14:6, 7.

Yehova amwenesele kakuluka yetu Yakova vangelo vali nakunyina nakusuluka ‘hajindondelo’ jize jafumine hamavu nakuheta mwilu kuhichila muchilota (Kuputuka 28:10-12) Atela Yakova ashinganyekele vyuma vize tunahase kushinganyeka nayetu. Ashinganyekele ngwenyi Yehova Kalunga eji kutumanga vangelo vazate milimo yimwe hamavu nakukafwa vatu vakushishika vaze vali muukalu.—Kuputuka 24:40; Kulovoka 14:19; Samu 34:7.

“Amwene jindondelo jize jafumine hamavu nakuheta mwilu. Kaha amwene vangelo jaKalunga vali nakunyina nakusuluka hajindondelo kana.”—Kuputuka 28:12.