Kostas ambile ngwenyi: “Ami napuwami Sophia a twatwamine muulo hamyaka yakuzomboka 39 shimbu kanda aputuke kuviza chikuma nakufwa. Omu afwile, masepa jami vangukafwilenga chikuma kaha nawa ngwawanyinengako lwola lwakulinga vyuma vyeka. Chipwe ngocho, kufwa chapuwami changukolele chikuma kumuchima hamwaka wamuundu. Ngwevwilenga chikuma ushona, kaha ngwahombelenga. Numba tuhu munahichi lyehi myaka yitatu kufuma halwola afwile, oloze kakavulu ngweji kwivwanga ushona nakungulingisa nguhombe.”

Uno mwafwisaho lyehi mutu mwazanga tahi? Nge mukiko, kaha nayenu munahase kwitavila mazu ahanjikile Kostas. Kufwisa muka-mahyenu, chipwe kausoko kenu, chipwe sepa lyenu, cheji kwivwisanga kukola kumuchima kuhambakana kala ukalu. Vatu valinangula chikuma navakiko vetavila mazu kana. Chihande chimwe chatwama mumangazini yaThe American Journal of Psychiatry ngwacho: “Kufwisa mutu mwazanga cheji kunehanga ushona nakumilingisa mwivwenga kumuchima kupihya.” Ushona eji kupwanga nawo mutu nafwisa unahase kumulingisa alihulise ngwenyi: ‘Uno kulishona chami nachikakuma mwaka uka? Uno nangukapwa wakuwahilila cheka tahi? Kulihi ngunahase kuwana kuvendejeka?’

Yino mangazini yaTonenu! yinakumbulula vihula kana. Chihande chinakavangizaho chinashimutwila havyuma munahase kulinga nge mutu mwazanga nafu. Kaha vihande vinakavangizaho navimikafwa mukeheseko ushona wenu.

Shikaho tunafwelela ngwetu vihande vinakavangizaho navikafwa kala mutu ali naushona wakufwisa mutu azanga.