MAKUMBI ANO VATU VALI NAKUHEHWOJOLA CHIKUMA HAUSHONA VEJI KWIVWANGA VATU NGE VANAFWISA. Ngana muze tunashimutwila lyehi, jijila jamwaza chikuma jakukafwilamo vaze vanafwisa, jalifwanako najize jamuMbimbiliya. Echi chasolola nge jindongi jamuMbimbiliya kajasekako, kaha nawa mwatwama jindongi jajivulu jize jinahase kutukafwa chikuma. Jindongi jatwama muMbimbiliya katweshi kuhasa kujiwana kwekako.

• Mbimbiliya yatulweza ngwayo vafu kaveshi nakuyoya chekako

  Mukanda waMuka-kwambulula 9:5 wamba ngwawo: “Vafu kavatachikiza chuma numba chimweko.” Kaha nawa vatu nge vanafu “Vishinganyeka [vyavo] vyeji kunonganga.” (Samu 146:4) Mbimbiliya nawa yafwanyisa kufwa kukusavala tulo.—Yowano 11:11.

• Kufwelela chikuma Kalunga wazangi cheji kutuvendejekanga

  Mukanda waSamu 34:15 wamba ngwawo: “Meso aYehova a eji kutalanga vaka-kwoloka, Kaha matwitwi enyi eji kwivwililanga kutuwelele twavo.” Kuhanjikanga omu tuli nakwivwa mukulomba chetu kuli Kalunga, chikiko chachilemu kuhambaka kala jila navatuvendejekelamo. Mwomwo kulomba cheji kutukafwanga tutunge usoko wakukola naTengi yetu, uze eji kuzachisa ngolo jenyi mangana atuvendejeke.

• Twatalilila kuyoya chamwaza kulutwe

  Achishinganyekenu kuwaha natukevwa omu navakasangula vosena vaze vali muvimbumbe nakutwama navo hano hamavu! Mbimbiliya yahanjika chikuma omu nachikapwa chiyoyelo halwola kana. Yalumbununa ngwayo: ‘Kalunga mwakahunda masoji osena kumeso etu, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.’—Kusoloka 21:3,4.

Yehova Kalunga uze apwa mwenya Mbimbiliya, eji kuhananga ngolo vatu vaze vamufwelela, mangana vomikenga halwola vali nakulishona, nakufwelela ngwavo navakamona vausoko wavo vaze vafwa. Chakutalilaho, Ann uze afwisa lunga lyenyi wamyaka 65, ambile ngwenyi: “Mbimbiliya yangufwelelesa ngwayo, numba tuhu vatu vaze twafwisa kaveshi nakuyoya chekako oloze Kalunga mwakasangula vosena vaze vali muvishinganyeka vyenyi. Kushinganyeka halutalililo kana, cheji kungulingisanga ngumike muukalu wakufwisa lunga lyami.”

Tiina, uze tunashimutwila muvihande vinafumuho ambile ngwenyi, “Kufuma vene halikumbi afwile lunga lyami Timo, ngunamono omu Kalunga ali nakungukafwa lika. Ngunamono chikupu omu Yehova nangukafwenga halwola ngunapunga muukalu wakufwisa. Kaha ngwafwelela chikuma lushiko lwamuMbimbiliya lwakusangula vafu.”

Vishinganyeka kana vikiko vetavila navatu vavavulu vaze vafwelela Mbimbiliya. Oloze nge mweji kushinganyekanga ngwenu mazu amuMbimbiliya kaweshi kukatesamoko, kaha kekesenu enu vavene muwane unjiho watwamamo uze naumikafwa mwitavile ngwenu jishiko kana japwa jakwoloka. Kaha munahase kuketavila ngwenu Mbimbiliya himukanda wamwaza uze naukafwa chikuma vaze vali nakulishona.

Talenu jivindiyo jahanjika hachihande kana hakeyala yetu ya jw.org/lue

 VYUMA MUKA VYEJI KUSOLOKANGA KUVAFU?

UNO MULI NAKUSAKA MUJIMBU WAMWAZA TAHI?