Munahase kuwana jindongi jajivulu jize jinahase kumikafwa nge munakulishona. Jindongi jimwe jinahase kumikafwa, kaha jeka kajeshi kumikafwako. Kweseka nomu tunavuluka lyehi, vatu veji kulishonanga mujila yakulihandununa. Jindongi jimwe kajeshi kuhasa kukafwa vatu vosenako.

Chipwe ngocho, kuli jindongi jimwe jize jinakafwenga vatu vavavulu chikuma. Jindongi kana veji kujizachisanga chikumanyi kuli vaka-kukafwa vatu vaze vanakulishona, kaha jeji kukafwanga vatu makumbi ano. Eji jindongi kana jatwama muMbimbiliya mukanda wakushikulu wamwenemwene.

• Vaka-kulinangula vamba ngwavo kwitavila kutukafwa kuli vakwetu navatanga jetu cheji kutukafwanga nge tunakulishona. Shimbu jimwe munahase kupwa ukawenu. Lwola lumwe nawa munahase kupihilila navatu vaze vanakusaka kumikafwa. Nge mukiko kaha kanda namulizakaminako.

• Kamwatela kushinganyeka ngwenu mwatela kupwanga navakwenu lwola lwosenako. Chipwe ngocho, kamwatela kuvahangako mwomwo kulutwe namukasaka vakamikafwe cheka. Mwatela kulweza vakwenu mujila yalikoji vyuma munakusaka navize kamwasakileko halwola kana.

• Mwatela kunoneka lwola lwakupwanga navakwenu, nalwola lwakupwanga ukawenu.

JINDONGI JAMUMBIMBILIYA: “Vavali vanawahe kuhambakana mutu umwe . . . Kachi nge umwe nalimbuka, mukwavo mwamuhindula.”—Muka-kwambulula 4:9, 10.

• Kulya chamwaza nachimikafwa muhone kuhomba chikuma nge munakulishona. Mwatela kulyanga mihako yakulisezaseza, navisakwola nakulya chakukolesa mujimba.

• Nwenunga meya amavulu navyuma vyeka vyameya.

• Nge kamweshi nachipepa chavyakulyako, kaha mwatela kulyanga vyakulya vyavindende mukamwihi mukamwihi. Mwatela kuhulisa ndotolo amilweze vyakulya mwatela kulya. a

• Kutambukanga washiwashi nakulinyukanga kumujimba cheji kukafwanga mutu akeheseko kulizakamina. Kulinyuka kumujimba cheji kulingisanga mutu ahone kushinganyekanga chikuma hamutu nafwisa nakwivwa ushona chikuma.

JINDONGI JAMUMBIMBILIYA: “Kakweshi mutu ahunga mujimba wenyiko, oloze eji kuulisanga nakuuzakamanga.”—Wavaka-Efwesu 5:29, kweseka naNET Bible.

• Kusavala chapwa chachilemu chikumanyi kuli vatu vaze vali nakulishona. Mwomwo kulishona cheji kunehanga misongo.

• Kamwatela kunwa chikuma wala chipwe vyuma vyeka vize vinahase kumilingisa muhone kusavala tuloko.

JINDONGI JAMUMBIMBILIYA: “Kunokako chindende chinawahe kuhambakana kukilikita chikuma nakuhangasana peho.”—Muka-kwambulula 4:6.

• Tachikizenu ngwenu vatu veji kulishonanga mujijila jakulihandununa. Ngocho mwatela kulinga vyuma vize navimikafwa.

• Vatu vamwe vamona ngwavo kulwezako vakwavo kulishona chavo cheji kuvakafwanga, oloze veka kavasaka kulinga ngochoko. Vatu vaze valinangula chikuma veji kuhuhwasananga numba nge kulwezako vakwetu ushona wetu chinahase kutukafwa. Nge munakufwila kulweza mutu omu muli nakwivwa oloze chinamikaluhwila kulinga ngocho, kaha mwatela kuputuka kulwezako sepa lyenu chindende chindende.

• Kulila cheji kukafwanga vatu vamwe vahone kulishona chikuma, oloze vamwe veji kutwalangaho kulishona numba navalila tuhu ngachilihi.

JINDONGI JAMUMBIMBILIYA: “Muchima watachikiza kulyonyinga chawo.”—Vishimo 14:10, kweseka naNew International Version.

• Vatu vamwe vaze veji kulishonanga veji kufwilanga kukehesako kulishona chavo hakunwanga chikuma wala namaundu akupendesa. Kachapwa chakwoloka kulinga ngochoko mwomwo cheji kutangulanga mutu. Kala vyuma natulinga mangana tukeheseko kulishona kavyelilako, oloze vyeji kunehanga kaha ukalu waunene. Esekenu kulingako vyuma vize navimikafwa muhone kulizakamina.

JINDONGI JAMUMBIMBILIYA: “Tulitomesenu kuvyuma vyosena vyakupihisa mujimba nashipilitu.”—Wavaka-Kolinde 2, 7:1.

• Vatu vavavulu vachiwana nge chapwa chachashi kukehesako ushona hakulinga vyuma vize navivakafwa vahone kushinganyeka ukalu vali nakuhitamo.

• Kupwanga hamwe namasepa jenu, nakulinangula milimo yeka chipwe kulihizumunanga navakwenu chinahase kumivendejeka.

• Mukuhita chalwola, vyuma vinahase kwalumuka. Kaha namuwana jino nge kamweshi nakulishona chikuma nge muze chapwile hakavangako.

JINDONGI JAMUMBIMBILIYA: “Vyuma vyosena vikwechi lwola vavitongwela, . . . kuli lwola lwakulila, nalwola lwakuseha. Kuli lwola lwakulila jimbimbi, nalwola lwakukina.”—Muka-kwambulula 3:1, 4.

• Kanda kulangisako, putukenu cheka kulinga vyuma vize mwalingilenga.

• Kachi nge namulijilisa lwola lwakusavala, nalwakuzata milimo yimwe, nalwakulinga vyuma vyeka kaha namukehesako kulishona.

• Pwenunga navyakulinga vyavivulu mangana mukeheseko kulishona.

JINDONGI JAMUMBIMBILIYA: “Keshi kumona omu nawahita makumbi akuyoya chenyi hakuwana nge Kalunga wamuchano namuhungika navyuma vize vili nakumwivwisa kumuchima kuwaha.”—Muka-kwambulula 5:20.

• Vatu vavavulu veji kuliveyanga mwomwo yakulusuka kulinga vyuma hanyima yakufwisa.

• Nge munahase, kaha vandaminenu muchihiteko lwola shimbu kanda mwalukile kuchihela cheka, chipwe kwecha milimo chipwe kuhana vyuma vyamutu munafwisa.

JINDONGI JAMUMBIMBILIYA: “Vyuma veji kujinanga vaka-mangana vyeji kufukilanga, oloze vaka-kulusuka kulinga vyuma veji kuhutwanga.”—Vishimo 21:5.

• Vatu vamwe vaze vafwisa, veji kulingangako vyuma vimwe vize navivakafwa mangana vanukileho uze nafu.

• Kulama jifwato chipwe kala chuma chamutu uze afwa, chipwe kusoneka mumukanda vyuma mwalingilenga hamwe namutu mwafwisa vinahase kumivendejeka.

• Lamenunga vyuma vimwe vyamwaza vyamutu uze nafu mangana mumwanukilengaho.

JINDONGI JAMUMBIMBILIYA: “Anukenunga makumbi akushikulu.”—Lushimbi lwamuchivali 32:7.

• Munahase kutambulako makumbi akuhwima kumilimo yenu.

• Kachi nge kutambula makumbi kumilimo kacheshi kuhashiwako, kaha yenu nakwololako mahinji chipwe kuya nakutambukila jizuvo jakulamina vyuma vyakushikulu chipwe kulingako vyuma vyeka.

• Munahase kulingako vyuma vyeka vize kamwalinga shimbu yosenako.

JINDONGI JAMUMBIMBILIYA: “Tuyenu kwauka wetu kupenge mukanoke chindende.”—Mako 6:31.

• Anukenu ngwenu, kala lwola namukafwa vakwenu chinahase kumilingisa mukeheseko kulyonyinga.

• Kumika hakufwisa mutu mwazanga chinahase kumikafwa mukolezeze vausoko wenu, navatu veka vaze vanahombo mwomwo yakufwisa mutu kana.

• Kukafwa nakuvendejeka vakwenu, chinahase kumilingisa mupwenga cheka vakuwahilila nakupwa vakusuuluka.

JINDONGI JAMUMBIMBILIYA: “Kuhana cheji kunehanga kuwahilila chikuma kuhambakana kutambula.”—Vilinga 20:35.

• Kulishona chinahase kulingisa mutu atachikize kanawa vyuma vyavilemu chikuma.

• Lwola munakulishona lunahase kumikafwa mukekese omu chili chiyoyelo chenu.

• Nge chinahase, kaha esekenu kwalumunako vyuma mwamona kupwa vyavilemu chikuma.

JINDONGI JAMUMBIMBILIYA: “Chinawahe kuya kuzuvo yakulishonena kuhambakana kuya kuzuvo yakulya nakunwa, mwomwo kufwa himakumishilo avatu vosena. Kaha vaze vali nakuyoya vatela kuchihaka kumuchima.”—Muka-kwambulula 7:2.

 Kuhanjika kaha muchano, kakweshi vyuma vinahase kukumisa kulishona chenu chosenako. Oloze vatu vavavulu vaze vafwisaho lyehi, vetavila ngwavo kukavangiza vyuma vyakufwana nge evi tunashimutwila muchihande chino, vinavakafwe vakeheseko kulishona. Chipwe ngocho, vyuma tunashimutwila keshi vikiko kaha vinahase kukafwa vatu vakeheseko kulishonako. Oloze nge namweseka kukavangiza vyuma vimwe tunashimutwila muchihande chino kaha navimikafwa chikuma.