Chiyoyelo chaTanga naMwakupwila naMasepa Vamwenemwene
Vatu vamwe veji kuchiwananga kupwa chachikalu kutunga usepa wakukola. Shinganyekenu hajindongi jamuMbimbiliya jize jinahase kumikafwa mupwenga nausepa wakukola mukuyoya chenu.
LIHENDENU KUKULIZANGA ENU VAVENE
LUNDONGI LWAMUMBIMBILIYA: “Kanda kuhakanga kulutwe vyuma mwasaka enu kahako, oloze navyuma vasaka vakwenu nawa.”—Wavaka-Fwilipi 2:4.
OMU LWALUMBUNUKILA LUNDONGI KANA: Usepa weji kufukilanga, shina uze wazama hakuhana keshi hakutambulako. Kachi nge namulizanga enu vavene kaha munahase kuhona kutunga usepa navakwenu. Chakutalilaho, kachi nge muka-mahyamutu atwama namuchima wakulizanga yivene, chinahase kumulingisa ahone kushishika kuli muka-mahyenyi. Kaha nawa, naumwe wauchi asaka kupwa nasepa uze eji kulitukwojolanga havyuma atwama navyo chipwe vize atachikiza. Mukanda waThe Road to Character, wahanjika ngwawo, “kufwila kulinganyalisa mutu yivene cheji kunehanga ukalu waunene chikuma.”
VYUMA MWATELA KULINGA:
-
Kafwenunga vakwenu. Kupwa nausepa wakukola chasakiwa kupwa nakashishi nakulifwelela umwe namukwavo. Vaka-kuhehwojola vawana nge, vatu vaze veji kukafwanga vakwavo kavahomba chikumako, kaha nawa veji kupwanga vakuwahilila.
-
Kutetela. Kutetela chapwa kwivwa kupihya kumuchima mwomwo yavyuma vyavipi vinasolokela vakwetu. Kachi nge namupwa namuchima wakutetela kaha namulihenda kuhanjikiso yayipi, nakuhanjikiso yakasautu nakukuseseka chachipi vize vinahase kwivwisa vakwenu kupihya kumuchima.
Kachi nge namutetelanga vakwenu, kaha kamweshi kutokomenyanga hatutenga twavoko. Kupwa namuchima wakutetela nachimikafwa nawa mupwenga namasepa vakufuma kuvisemwa naviyoyelo vyakulisezaseza, nakuhona kumona vakwenu ulumbi.
-
Pwenunga nalwola lwakushikama navakwenu. Kushikamanga navakwenu nachimilingisa muvatachikize kanawa. Mwatela kushimutwilanga vihande vyamwaza mangana mupwenga namasepa vamwenemwene. Shikaho mwatela kupwa vaka-kwivwilila kanawa. Sololenunga ngwenu mwamona vyuma vasaka vakwenu kupwa vyavilemu. Kuhehwojola chakalinwomu chinasolola nge, “kushimutwila chamwaza cheji kulingisanga vatu vapwenga vakuwahilila.”
SAKULENUNGA KANAWA MASEPA
LUNDONGI LWAMUMBIMBILIYA: “Kulikata navatu vavapi cheji kupihisanga vilinga vyamwaza.”—Wavaka-Kolinde 1, 15:33, kwinyikila chamwishi.
OMU LWALUMBUNUKILA LUNDONGI KANA: Vatu mweji kulikatanga navo vanahase kumilingisa mupwenga navilinga vyavipi chipwe vyamwaza. Vaze valinangula havilinga vyavatu, navakiko vetavila chuma kana. Chakutalilaho, vamba ngwavo kachi nge mutu mwalikata navatu vaze veji kunwanga makanya chipwe vaze veji kulilukululanga chikuma, kaha namutu kana nahase kupwa muka-kunwa makanya chipwe muka-kulukulula.
VYUMA MWATELA KULINGA: Likatenunga navatu vaze vatwama navilinga vyamwaza vize mwafwila kupwa navyo. Chakutalilaho, munahase kulikata navatu vakuzangama, navaze vatwama nakalemesa, navaze vatwama namuchima wakuhana kaha nawa wachisambo.
JINDONGI JIKWAVO JAMUMBIMBILIYA
Talenu jivindiyo jize jazama haMbimbiliya jize jinahase kukafwa vaze valimbata, navakweze, navanyike mangana vafukile mutanga
LIHENDENU KUHANJIKISO YIZE NAYIVWISA VAKWENU KUPIHYA.
“Kuhanjika chakulusuka cheji kutuvanga nge poko yamukwale.”—VISHIMO 12:18.
PWENUNGA NAMUCHIMA WAKUHANA.
“Mutu muka-kuhana mwakafukila.”—VISHIMO 11:25.
LINGILENU VAKWENU VYUMA VIZE NAMUSAKA VAMILINGILE ENU.
“Vyuma vyosena namusaka ngwenu vatu vamilingile, nayenu nawa valingilenuvyo.”—MATEU 7:12.
