Kuhaka Mangana kuVyuma VyakuShipilitu
Muchihande chatete mumangazini yino, tunamono ngwetu, vatu vavavulu vamona Mbimbiliya kupwa himukanda wajila. Vatu kana vawana ngwavo, nge vanatange Mbimbiliya nakuzachisa vyuma vanatange veji kupandamanga chikuma kuli Kalunga, nakutachikiza omu vanahase kupwa vakuwahilila kuyoya.
Mbimbiliya yazachisa lizu, “vyakushipilitu” kulumbununa vilinga chipwe jila vatu veji kumwenangamo kuyoya. (WaYuta 18, 19) Vatu vaze kavasaka Kalunga avatwaminyineko vapendamina hakunangakana chavo, oloze vaze vasaka Kalunga avatwaminyine vamona jindongi jenyi kupwa jajilemu.—Wavaka-Efwesu 5:1.
LUTALILILO
LUNDONGI LWAMUMBIMBILIYA: “Kachi nge nauhomba halwola lwaukalu, kaha ngolo jove najikeha.”—Vishimo 24:10, kwinyikila chamwishi.
OMU LWALUMBUNUKILA LUNDONGI KANA: Vyuma vimwe navatulweza vakwetu vinahase kutulingisa tuhone kupwa nangolo jakukumisa ukalu mukuyoya chetu. Oloze lutalililo lunahase kutulingisa tupwenga vakumika muukalu. Kupwa nalutalililo nachitukafwa nawa tutachikize ngwetu ukalu tuli nakumona wakatando kakandende, kaha natukanganyala omu ukalu wetu naukakuma.
VYUMA MWATELA KULINGA: Esekenu kushinganyeka havyuma vyamwaza namukalivwisa kuwaha kulutwe. Mukutela kulizakamina havyuma vinahase kusoloka chipwe kuvandamina lwola naukakuma ukalu wenu, mwatela kutwalaho lika kuzata nangolo mangana mutesemo vyuma mwalitomena kulinga. Ijivenu ngwenu, “lwola navyuma vyakwiza mukukasumuna” vinahase kusoloka. (Muka-kwambulula 9:11) Chipwe ngocho, vyuma vyamwaza vinahase kusoloka kuhambakana muze twalizakaminanga. Shikaho, Mbimbiliya yahanjika hachakutalilaho chanjimi ngwayo: “Kuva mbuto jove nachimene, kaha livoko lyove kanda nalinoka palanga nakuchingoloshiko. Mwomwo kawatachikijile jimwe jilihi najifukila, kwiji eji tahi, nyi jize, nyi josena najifukila.”—Muka-kwambulula 11:6.
KUKUMBULULA VIHULA VYAVILEMU VYAMUKUYOYA
LUNDONGI LWAMUMBIMBILIYA: “Nguhane kunangakana . . . Mazu ove osena apwa muchano.”—Samu 119:144, 160.
OMU LWALUMBUNUKILA LUNDONGI KANA: Mbimbiliya yakumbulula vihula vyavilemu veji kuhulisanga vatu vavavulu. Chakutalilaho, yakumbulula vihula vyakufwana nge
-
Uno twafuma kulihi?
-
Mwomwo ika twapwila hano hamavu?
-
Vyuma muka vyeji kusolokanga kuli mutu nge nafu?
-
Kutala kuyoya chiliko chikiko kaha nachipwangako lika tahi?
Vatu vavavulu mukaye vanapu vakuwahilila mukuyoya chavo, mwomwo yakuwana kukumbulula chamwenemwene muMbimbiliya chavihula tunashimutwila, navihula vyeka nawa.
VYUMA MWATELA KULINGA: Kekesenu enu vavene muMbimbiliya muwane vyuma yanangula. Lwezenu kala Chinjiho chaYehova amikafwe mwivwishise Mbimbiliya. Yenu hakeyala yetu ya jw.org, chipwe yenu kukunguluka, kaveshi kumifwetesako kala mutu nahase kupwako.
JINDONGI JIKWAVO JAMUMBIMBILIYA
Talenu vindiyo yakwamba ngwayo Mwomwo Ika Twatela Kulinangwila Mbimbiliya? ha jw.org. Yili mumalimi akuzomboka 880
FWILENU KUTACHIKIZA KALUNGA NAKUKAVANGIZA JINDONGI JENYI.
“Vawahilila vaze vejiva ngwavo vasaka vyuma vyakushipilitu.”—MATEU 5:3.
LINANGULENU VYAVIVULU HALI KALUNGA UZE APWA MWENYAMBIMBILIYA.
“[Tondenunga] Kalunga . . . nakumuwana . . . Kapwa kwakusuku nayetu tuvosena mutu himutuko.”—VILINGA 17:27.
TANGENUNGA MBIMBILIYA NAKUSHINGANYEKA HAMAZU MUNATANGE.
“Evwila kuwaha jishimbi jaYehova, * kaha eji kutanganga jishimbi jenyi nakujishinganyekanga musana naufuku. . . . Kaha vyosena mwalinganga navifukilanga.”—SAMU 1:2, 3.
^ par. 23 Mbimbiliya yasolola ngwayo Kalunga lijina lyenyi ikiye Yehova.
Pamo Nauzanga Nawa
KAPOSHI KAKUTALILA
Mbimbiliya Yinahase Kungukafwa Ngachilihi Mukuyoya Chami?
Ou mukanda wakushikulu ukwechi vyuma vyakutukafwa.
