Kulikangula kuMujimba
Mbimbiliya kayapwa himukanda wahanjika havitumboko. Oloze yatwama najindongi jakutukafwa tupwenga vakulikangula kumujimba. Tushimutwilenu hajindongi jamuMbimbiliya jize jinahase kumikafwa mulikangule kumujimba.
ZAKAMENUNGA MUJIMBA WENU
LUNDONGI LWAMUMBIMBILIYA: “Kakweshi mutu ahunga mujimba wenyiko, oloze eji kuulisanga nakuuzakamanga.”—Wavaka-Efwesu 5:29.
OMU LWALUMBUNUKILA LUNDONGI KANA: Elu lundongi lwatukolezeza tuzakamenga mijimba yetu kweseka noho hakumina ngolo jetu. Kuhehwojola chimwe chasolola nge, kuhona kusakula kanawa vyakulinga cheji kulingisanga mutu ahone kulikangula kumujimba. Oloze kusakula kanawa vyuma vyakulinga, cheji kukafwanga mutu apwenga wakulikangula kumujimba.
VYUMA MWATELA KULINGA:
Vyakulya. Fwilenu kulyanga vyakulya vize navimikafwa mupwenga vakulikangula nakunwa meya amavulu.
Kulinyuka mujimba. Numba nge mwapwa muvitonji chipwe mwaviza misongo yakutekeleka, kaha kulinyuka mujimba chinahase kumilingisa mupwenga vakulikangula chamokomoko namyaka yakusemuka muli nayo. Numba tuhu vatu vaze valinangula vyakulikangula chavatu, navausoko navamikafwa mulinyukenga mujimba, oloze enu vavene mwatela kuzata nangolo.
Savalenunga lwola lwaluvulu. Kuhona kusavala lwola lwaluvulu chinahase kulingisa mutu avize musongo waunene. Vatu vavavulu kavasavala tuloko mwomwo yavyuma veji kulinganga halwola vatela kusavala. Oloze nge namusavalanga lwola lwaluvulu kaha namupwa vakulikangula.
ECHENU JITATO JAJIPI
LUNDONGI LWAMUMBIMBILIYA: “Tulitomesenu kuvyuma vyosena vyakupihisa mujimba nashipilitu.”—Wavaka-Kolinde 2, 7:1.
OMU LWALUMBUNUKILA LUNDONGI KANA: Tweji kupwanga vakulikangula kumujimba kachi nge katweshi kupihisa mujimba wetu navyuma vyakufwana nge makanya, aze eji kulingisanga vatu vavize chikuma nakufwa.
VYUMA MWATELA KULINGA: Sakulenu likumbi namukecha kunwa makanya nakulisoneka. Shimbu kanda likumbi kana lihete, mwatela kumbila makanya osena navyuma mweji kuzachisanga vyakufwana nge mitopa navyeka. Kanda namuyanga kuvihela kuze kwatwama vaka-kulinga vyuma tunavulukako. Kaha lwezenuko vakwenu vaze vanahase kukundwiza vyuma munasakula kulinga.
JINDONGI JIKWAVO JAMUMBIMBILIYA
Kachi nge munakusaka kupwa naMbimbiliya, kaha lwezenu Chinjiho chaYehova wamungalila yenu
LIKINGENUNGA KUPONDE.
“Omu namukatunga jizuvo jenu, katungenu navipato hamilungu yajizuvo kuchina namukalinehela mulonga wamanyinga nge hanaholoka mutu.”—LUSHIMBI LWAMUCHIVALI 22:8.
KANDA KUKWATANGA WASHI UTENUKO.
“Muka-kushipwokela kukwata utenu atwama nauhashi wakukekesa vyuma. Oloze mutu wakandakundaku eji kusololanga uleya wenyi.”—VISHIMO 14:29.
KANDA KUFWANGA HAKULYAKO.
“Kanda mulikata . . . navaka-kufwa hakulya[ko].”—VISHIMO 23:20.
Pamo Nauzanga Nawa
TONENU
Vyuma Mwatela Kulinga Mulikangule kuMujimba
Vyuma vitanu mwatela kulinga mupwenga vakulikangula kumujimba
TONENU
Mwakupwila Vakuwahilila—Kulikangula kuMujimba naKupwa Vakumika
Uno misongo yinahase kuhonesa mutu kupwa wakuwahilila tahi?
