LUNDONGI LWAMUMBIMBILIYA: “Vyuma veji kujinanga vaka-mangana vyeji kufukilanga, oloze vaka-kulusuka kulinga vyuma veji kuhutwanga.”—Vishimo 21:5.

OMU LWALUMBUNUKILA LUNDONGI KANA: Chapwa chachilemu kwanuka vyuma munajinyi kulinga nakuvikavangiza. Shikaho shinganyekenunga shimbu kanda muzachise jimbongo jenu. Tachikizenu ngwenu kamweshi kuhasa kulanda vyuma vyosena namusaka kulanda halwola lumweko. Shikaho zachisenunga kanawa jimbongo jenu.

VYUMA MWATELA KULINGA:

• Landenunga kaha vyuma munakusaka. Sonekenu vyuma vyosena munakusaka kulanda nakuvinoneka kanawa chuma hichuma. Kaha pangenu jimbongo namuzachisa kweseka navyuma munakusaka kulanda. Kachi nge munazachisa jimbongo jajivulu kuchuma chimwe kaha mbatenu jize mwasakanga kulanda vyuma vyeka. Chakutalilaho, kachi nge munazachisa jimbongo jajivulu kumaji amuminyau kuhambakana muze mwanonekanga, kaha munahase kuzachisa jize mwasakanga kuzachisa kukulihizumuna.

• Kanda kutambulanga mikuli chamutambwilako. Nge chinahase kaha lihendenu kukutambulanga mikuli. Kulinga ngocho, nachimikafwa kulamanga jimbongo jakulanda vyuma namusaka. Kachi nge munatambula vyuma kuzachisa chitupa vavuluka ngwavo credit card, kaha zatenu nangolo mangana mukindulwise mukuli wambala hakufwetanga chimbwa kakweji hikakweji. Nge muli namukuli uze munejiva ngwenu kamweshi kuhasa kufweta washiko, mwatela kunoneka jila namukaufwetelamo nakukavangiza vyuma munanoneka.

  Kuhehwojola chimwe chasolola nge vaze veji kutambulanga vyuma kuzachisa chitupa vavuluka ngwavo credit card, veji kuzachisanga jimbongo  jajivulu chikuma. Shikaho, nge muli nachitupa kana, kaha chizachisenunga mujila yamwaza.

LUNDONGI LWAMUMBIMBILIYA: “Muvwa keshi kuzata mungonde yakulimako, oloze halwola lwakwaha eji kulombanga vyakulya omu nazeneka kupwa navyo.”—Vishimo 20:4.

OMU LWALUMBUNUKILA KANA: Uvwa weji kulingisanga mutu apwenga chihutu. Shikaho mwatela kuzata nangolo nakushinganyeka mwakukazachishila jimbongo jenu kulutwe.

VYUMA MWATELA KULINGA:

• Zatenunga naNgolo. Kuzata nangolo kumilimo, chinahase kulingisa vakulwane vamilimo vamifwelele chikuma, nakufwila muvazachilenga lika.

• Pwenunga vakashishi. Kamwatela kwiva kumilimoko. Kuhona kupwa vakashishi chinahase kupihisa lijina lyenu nakumilingisa muchiwane kupwa chachikalu kuwana milimo yeka.

• Lihendenu kumuchima wakuzanga chikuma jimbongo. Kupwa namuchima wakuzanga chikuma jimbongo, chinahase kumilingisa muhone kupwa vakulikangula nakuhichikisamo usepa wenu navakwenu. Shikaho tachikizenu ngwenu kuyoya chapwa chachilemu kuhambakana jimbongo.

KANDA NAMWENYEKA LWOLA LWENU NAJIMBONGO KUJITATO JAJIPIKO.

“Mwomwo vaka-kupenda navaka-kufwa hakulya navakahutwa, kaha kuzembela tulo nachivwika mutu vipuzu.”—VISHIMO 23:21.

KANDA KULIZAKAMINA CHIKUMA HAVYUMA VYAMUKUYOYAKO.

“Litwaminenu kulizakaminanga hakuyoya chenu ngwenu namulya ika, chipwe ngwenu namunwa ika, chipwe kulizakamina hamijimba yenu ngwenu namuvwala ika.”—MATEU 6:25.

LIHENDENUNGA KUMUCHIMA WALUSHIUSHIU.

“Muka-lushiushiu afwila luheto, oloze keshi kutachikiza ngwenyi mwakahutwako.”—VISHIMO 28:22.