Vishinganyeka Vyamwaza
Mbimbiliya yatuhuhumuna tulihende kukupwa navishinganyeka vyavipi, oloze yatukolezeza tupwenga navishinganyeka vyamwaza.
UTENU
LUNDONGI LWAMUMBIMBILIYA: “Muka-kushipwokela kukwata utenu nawahe kuhambakana chindume.”—Vishimo 16:32.
OMU LWALUMBUNUKILA LUNDONGI KANA: Tweji kunganyalanga chikuma kachi nge natupwa nangolo jakuhonesa utenu. Numba tuhu lwola lumwe tuvosena tweji kukwatanga utenu, oloze kukwata washi utenu cheji kunehanga ukalu. Vaka-kuhehwojola vawana nge vaka-kukwata washi utenu veji kulinganga vyuma vize navikavalingisa vakaliveye kulutwe.
VYUMA MWATELA KULINGA: Wanenu mwakuhonesela utenu shimbu kanda mulinge vyuma vize namukaliveya kulutwe. Vatu vamwe vashinganyeka ngwavo, utenu weji kusololanga nge mutu apwa wangolo kuhambakana vakwavo, oloze vatu vautenu vapwa vakuhehela chikuma. Mbimbiliya yahanjika ngwayo: “Nganomu yinapu nganda yikwechi kembwe yakupuzuka, mukiko mwanapu namutu uze mwahona kuunjisa matoto enyi.” (Vishimo 25:28) Jila yimwe munahase kuhoneselamo utenu shina kuvangila kuwana mashina namasongo avyuma vimwe vinasoloka. Mbimbiliya ngwayo: “Kunangakana chamutu cheji kuunjisanga matoto enyi.” (Vishimo 19:11) Chapwa chamwaza kuvangila kuwana mashina namasongo avyuma vimwe, mwomwo chinahase kutulingisa tuhone kukwata chikuma utenu.
MUCHIMA WAKUSAKWILILA
LUNDONGI LWAMUMBIMBILIYA: “Sololenunga kusakwilila chenu.”—Wavaka-Kolose 3:15.
OMU LWALUMBUNUKILA: Vatu vamwe vamba ngwavo mutu uze atwama namuchima wakusakwilila ikiye apwa wakuwahilila. Navatu vaze vahitaho lyehi muukalu waunene veji kwitavilanga chishina kana. Veji kwambanga ngwavo chuma cheji kuvalingisanga vapwenga navishinganyeka vyamwaza shina kupwa vakusakwilila havyuma vali navyo keshi kulinyenga havyuma vanatokesako.
VYUMA MWATELA KULINGA: Mwatela kusonekanga vyuma vize namusakwilila hakumbi hakumbi. Evi vyuma kavyatela kupwa vyuma vyavineneko. Shinganyekenunga havyuma vyavindende vyakufwana nge kututuka chalikumbi, nakushimutwila namutu mwazanga, nakupwa nakuyoya. Kushinganyeka havyuma kana chinahase kumilingisa mupwenga vakuwahilila.
Kushinganyeka havyuma vyamilingisa mupwenga namuchima wakusakwilila hakupwa natanga namasepa vamwenemwene, chinahase kumikafwa chikuma. Kachi nge munatachikiza jino vyuma vyamwaza mwatela kusakwilila vakwenu, kaha mwatela kuvalwezavyo meso nameso, chipwe kuvasonekela mukanda chipwe kuvatumina mujimbu hashinga. Kulinga ngocho nachimikafwa mutunge usepa wakukola nakumilingisa mupwenga vakuwahilila chize cheji kufumanga hakuhana. —Vilinga 20:35.
JINDONGI JIKWAVO JAMUMBIMBILIYA
Munahase kututulula Mbimbiliya mumazu akukopa. Yili jino mumalimi kafwe 40 ha jw.org
LIHENDENUNGA KUVIKOKOJOLA.
“Kuputuka chandombo chinapu nge kusokolola vikolo vyameya. Shimbu kanda vikokojola vyepuke, katuka uyenga.”—VISHIMO 17:14.
LIHENDENU KUKULIZAKAMINA HAVYUMA VYAKULUTWE.
“Shikaho kanda namulizakamina vyalikumbi lyahameneko, mwomwo likumbi lyahamene nalikapwa navyalyo vyakulizakamina. Likumbi hilikumbi lili naukalu walyo.”—MATEU 6:34.
FWILENUNGA KUWANA MASHINA NAMASONGO SHIMBU KANDA MUKWATE UTENU.
“Kaha uhashi wakushinganyeka naukukinganga. Uhashi wakukekesa vyuma nawa naukulamanga.”—VISHIMO 2:11.
Pamo Nauzanga Nawa
TONENU
Vyuma Mwatela Kulinga Mangana Muhone Kulizakamina
Shimutwilenu hajindongi jimwe jize jinahase kumikafwa muhonese kulizakamina chipwe kukehesako kulizakamina.
