Monenunga Vyuma Vyamwaza Muli Vakwenu
Ukalu
Muchima wakulitukwojola weji kulingisanga mutu amone vakwavo ulumbi. Mutu wakulitukwojola eji kumonanga vishinganyeka vyenyi kupwa vyavilemu. Eji kulimonanga kupwa wamulemu nakumona vakwavo kupwa vakukuminamo chikuma. Chikupu vene, kala mutu nahase kwingila mumuheto kana. Mukanda waThe Encyclopædia Britannica wamba ngwawo: “Muvisemwa vyavivulu vatu vamona chiyoyelo chavo, nakulya veji kulyanga, najila veji kuvwalilangamo, navilinga vyavo, navyuma vafwelela, navyeka kupwa vyavilemu chikuma kuhambakana vyavakwavo.” Uno natuhasa kulihenda ngachilihi kuvishinganyeka kanevi vyakuhenga?
Lundongi LwamuMbimbiliya
“Linyisenunga nakumona vakwenu ngwenu vamihambakana enu.”—WAVAKA-FWILIPI 2:3.
Uno chisoneka kana chalumbununa ika? Twatela kupwa vakulinyisa mangana tuhonese muchima wakulivwimba. Muchima wakulinyisa nautukafwa tumone ngwetu nakuvihela vimwe nawa vakwetu vamwe vanakuyoya kanawa kuhambakana yetu. Tachikizenu nawa ngwenu, kakwatwama muyachi ukwechi vyuma vyosenako.
Talenu chakutalilaho chaStefan. Ou lunga numba tuhu akolelele mulifuchi muze vatu vamwenenga vakwavo ulumbi oloze ikiye ahonesele muchima kana. Ambile ngwenyi: “Ngwatachikijile ngwami kumona vakwetu kupwa vavalemu kuhambakana yami nachingukafwa nguhonese tato yakumona vakwetu ulumbi. Hakuwana nge kangwatwama nauhashi wavyuma vyosenako ngocho ngunahase kulinangula vyuma vimwe kuli kala mutu.”
Vyuma Mwatela Kulinga
Mwatela kulitachikiza kanawa enu vavene nakutachikiza nawa ngwenu nayenu shimbu jimwe mweji kulimbenjanga. Tachikizenu nawa ngwenu vakwenu vanahase kupwa nauhashi muvyuma vimwe kumbakana enu. Kanda kushinganyeka ngwenu vatu vakufuma kumuyachi woumwe vakwechi tutenga twotumweko.
Muchishishisa chakuhanjika vyuma vyavipi kumutu uze nafumu kumuyachi weka, lihulisenu vihula vino:
Tachikizenu nawa ngwenu vakwenu vanahase kupwa nauhashi muvyuma vimwe kumbakana enu
-
‘Uno chikupu vene vilinga vize vyangulingisa nguhunge mukwetu mutu, vyapwa vyavipi tahi nyi vyalihandununa kaha navize vyami?’
-
‘Uno mutu kana, nayami nahase kunguwanyina katenga tahi?’
-
‘Uno kuliko vyuma vimwe vize nahase kuzata kanawa kuhambaka yami tahi?’
Nge namukumbulula ngwenu eyo, kaha munahase kuhonesa muchima wakumona vakwenu ulumbi, nakufwila nawa kulondezeza vilinga vimwe kuvatu kana.
Pamo Nauzanga Nawa
KUKUMBULULA VIHULA VYAKUPANDAMA KUMBIMBILIYA
Vyuma Muka Yahanjika Mbimbiliya Kutalisa kuChihande chaKulimbata Vatu VakuMiyachi Yakulihandununa?
Talenu jindongi jimwe jamuMbimbiliya jahanjika hakuhona kulimona ulumbi nahaulo.
