Vatu vavavulu vali nakuzachisa jindongi vanavuluka muvihande vinafumuho, echi chinavakafwe vakeheseko muchima wakumona vakwavo ulumbi. Kuhanjika muchano, etu vatu vakuhona kukupuka katweshi kuhasa kufumisako muchima wakumona vakwetu ulumbiko. Uno kuhona kumona vatu ulumbi nachikakuma tahi?

Jifulumende javatu jinahono kufumisako kulimona ulumbi. Uno echi chili nakulumbununa nge kakweshi fulumende yinahase kufumisako kulimona ulumbi tahi?

Fulumende yize nayihasa kufumisako kulimona ulumbi yatela kulinga vyuma vino

1. 1. Yatela kukafwa vatu valumune vishinanganyeka vyavo najila veji kumwenangamo vakwavo vatu.

2. 2. Yatela kukafwa vatu vambile muchima wakulinga sambanjinga, mwomwo vatu vamwe vashinganyeka ngwavo nge vakwenu vanakulingi mwamupi, kaha nayove watela kuvahilwishilamo.

3. 3. Yatela kupwa navatwamina vaze kavamona mutu numba umwe ulumbiko.

4. 4. Yatela kununga vatu vakumafuchi osena.

Mbimbiliya yatulweza ngwayo, Kalunga ahakako fulumende kana. Eyi fulumende vayivuluka ngwavo ‘Wangana waKalunga.’—Luka 4:43.

Talenu vyuma nayikalinga eyi fulumende.

‘Vatu navakalinangulanga kwoloka.’—ISAYA 26:9.

“Kwoloka chamwenemwene nachikaneha kuunda. Kwoloka chamwenemwene nachikaneha kuunda namukingo haya myaka yosena.”—ISAYA 32:17.

Uno echi chili nakulumbununa ika? Chili nakulumbununa nge Wangana waKalunga naukanangula vatu vyuma vyakwoloka. Kachi nge vatu navalinangula vyuma vyakwoloka nakulinga vyuma kweseka naMbimbiliya, kaha navamonanga vakwavo mujila yakwoloka. Echi nachikalingisa vatu vosena vakazange vakwavo.

Kalunga “mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako. Vyuma vyakulivanga vinafumuko lyehi.”—KUSOLOKA 21:4.

Uno echi chili nakulumbununa ika? Chili nakulumbununa nge Wangana waKalunga naukafumisako ukalu wosena uze weza mwomwo yaviyulo vyakuhenga. Vatu vaze valumbilishilenga kaveshi kukalama koko chipwe kwivwa cheka kupihya havyuma kanako.

“Keshi kukasopesa vatu havyuma mwakamona namesoko, chipwe kuhanjikila vatu kweseka nomu mwakevwa namatwitwi enyiko. Mwakayulanga mwakwoloka vihande vyavaka-kukalikiza, mwakahanjikila vatu mukusungama mangana vatu vavavwovu vahamavu vakatokwelemo.”—ISAYA 11:3, 4.

Uno echi chili nakulumbununa ika? Yesu Kulishitu uze apwa Mwangana waWangana waKalunga mwilu, mwakayula mwakwoloka hamavu hosena. Yesu kamona lifuchi limwe kupwa lyalilemu kuhambakana likwavoko, kaha mwakamona chikupu ngwenyi jishimbi jenyi jakwoloka vali nakujikavangiza kuvatu vosena hamavu.

Wangana waKalunga weji kunangulanga vatu vapwenga ‘navishinganyeka vyovimwe, nakupwa nazangi yoyimwe, nakulinunga hamwe, nakushinganyeka mwomumwe.’—WAVAKA-FWILIPI 2:2.

Uno echi chili nakulumbununa ika? Kulinunga chize navakapwa nacho vatu vamuWangana waKalunga kacheshi kukapwa chakuhanjika hakanwa kahako. chikupu vene, vatu kana ‘navakalinunga hamwe’ mwomwo navakalizanga umwe namukwavo.