Kwambulula mijimbu yamakuli chinahase kulingisa vatu vamone vakwavo ulumbi. Tuchitalenu havyakutalilaho vino:

• Vakulwane vamilimo vamwe vashinganyeka ngwavo mapwevo kavatamo kuzata milimo yakuzachisa makina akufwana nge jikopyuta namakina ekako.

• Mumafuchi akuEurope, vaYuleya vavavangijikilile ngwavo vakiko vapwile nakuhaka ulembe mumashima nakutanjisa misongo. Kaha muchiyulo chavaka-Nazi nawa vaYuleya vavavangijikilile cheka. Makumbi ano nawa, vanavavangijikila ngwavo vakiko vali nakuneha uhutu mulifuchi lyaGermany. Echi chalingisa vaYuleya vamwe vavamone ulumbi namakumbi ano.

• Vatu vavavulu vamba ngwavo vitonji, navatu vakufwana nge tuveve natupuputa kavapwa vakuwahililako kaha nawa vapwa vavakalu michima.

Vatu vaze vetavila vyuma kanevi vyamakuli veji kuwananga vyakutalilaho vimwe vize vyeji kukundwizanga vishinganyeka vyavo vyakumona vakwavo ulumbi. Kaha veji kushinganyeka ngwavo weshowo mwahamika vyuma kana, keshi nachinyingi chavyuma kanako.

“Kachapwa chamwaza mutu kutwama chakuzeneka chinyingiko.”—VISHIMO 19:2.

Uno chisoneka kana chalumbununa ika? Nge katwatachikijile muchanoko, kaha nachitulingisa tusakule vyuma vyakulinga mujila yekuhenga. Nge natwitavila mijimbu yakuhenga kaha chinahase kutulingisa tumone vatu ulumbi.

Nge natutachikiza kanawa omwo vapwa vatu, kaha katweshi kwitavila kala mujimbu wamakuli uze navatulweza  kutalisa kuli vakikoko. Nge tunamono ngwetu mujimbu vatulwezanga kutalisa kuvatu kana wamakuli, kaha katweshi kwitavila kala mijimbu natwivwako.

• Vatu vamwe vanahase kuvamba ngwavo vakwechi vilinga vyavipi, oloze tachikizenu ngwenu keshi nge vatu vavosena hakachi kavatu kana vakwechi vilinga vyavipiko.

• Kaha nawa tachikizenu ngwenu kamweshi kuhasa kutachikiza mijimbu yosena havatu kanako

• Fwilenu kuhehwojola mangana muwane unjiho wakwoloka.