Kachi nge natumona ngwetu etu twapwa tuvavalemu kuzomboka vakwetu, kaha twatela kumona ngwetu ou hiukalu waunene chipwe ngwetu hikulimbenja chikupu. Muchima kana, unanahase kutulingisa tumone vakwetu kupwa vamokomoko nakuvamona ulumbi. Nge natumona vakwetu mujila yayipi, kaha nachipwa chachikalu kuvatetela. Kuhona kuvatetela nachitulingisa tuvamone ulumbi.

“Wahililenunga navaze vanawahilila. Lilenunga navaze vali nakulila.”—WAVAKA-LOMA 12:15.

Uno chisoneka kana chalumbununa ika? Echi chisoneka chatunangula nge twatela kutetelanga vakwetu. Kutetela chapwa kwivwa nganomu anakwivwa mukwenu.

Nge natutetelanga vakwetu kaha nayetu tunahase kwivwa ngana muze vali nakwivwa navakiko. Kaha navakiko nawa vanahase kwivwa mwomumwe. Kutetelanga vakwetu nachitukafwa tutachikize ngwetu chamokomoko nachisemwa chavo chipwe nokwo vafuma oloze tuvosena twapwa vamutanga yimwe. Nge natulinga ngocho kaha katweshi kumona vakwetu ulumbiko.

Kupwa namuchima wakutetela nachitukafwa tuvumbikenga vakwetu. Anne-Marie wakuSenegal atwaminenga mungalila muze vatu vamwe vavamwenenga kupwa vamokomoko, alumbunwine omwo kupwa namuchima wakutetela chinamukafwe, ngocho ambile ngwenyi: “Omu ngwamwene vatu vaze vamwenenga kupwa vakukuminamo chikuma vali nakumona ukalu, ngwalyambile ngwami uno nge yami ngwapwanga nakuyanda ngana, kachi nangwivwa ngachilihi? Ngwamwene jino ngwami kangwapwa nguwamulemu chikuma kuhambakana vatu kanako.” Chikupu vene, nge natwivwishisa kanawa ukalu vali nakuhitamo vakwetu kaha nachitulingisa tupwenga namuchima wakuvatetela nakuhona kuvamona mujila yayipi.

Nge mwamona vatu vamwe mujila yayipi, kaha fwilenu kumona vilinga vimwe vatwama navyo vatu kana vize mwatwama navyo nayenu. Chakutalilaho, achishinganyekenu omu veji kwivwanga vatu kana nge

• Vanakulya vyakulya hamwe navaka-tanga yavo

• Vanakumisa kuzata mulimo waunene vapwanga nawo

• Vali hamwe namasepa javo

• Vali nakwivwilila kumyaso vazanga chikuma

Kufumaho, shinganyekenu nge nayenu mwapwanga hakachi kavo. Kaha lihulisenu ngwenu:

• ‘Uno nangulinga ngachilihi kachi nge vakwetu navangumona kupwa nguwamokomoko?’

• ‘Nangwivwa ngachilihi nge vakwetu navahanjika vyuma vyavipi hali yami chakuzeneka kutachikiza kanawa omu ngwapwa?’

• ‘Nge nayami ngwapwanga hamukana wavatu kana, uno kachi nangusaka vakwetu vangumone ngachilihi?’