Muchima wakumona vakwetu ulumbi kaweshi kuya muwashiwashiko. Ngana muze cheji kumbatanga lwola nangolo numba musongo unakwate mutu ukume, cheji kumbatanga nawa lwola nangolo numba mutu ambile muchima wakumona vakwavo ulumbi. Uno vyuma muka mwatela kulinga numba mumbile muchima wakumona vakwenu ulumbi?

“Vwalenunga zangi, mwomwo yikiko yeji kununganga vatu hamwe mujila yakukupuka.”—WAVAKA-KOLOSE 3:14.

Uno chisoneka kana chalumbununa ika? Kulingila vatu vyuma vyamwaza cheji kunehanga kuunda. Kusolwelanga vakwenu zangi, nachimikafwa mukeheseko muchima wakuvamona ulumbi. Zangi nayimilingisa muhone kumona vakwenu mujila yayipi.

Shinganyekenuko vyuma vimwe munahase kulingila vatu vakumuyachi weka vaze mwamwenenga mujila yayipi. Munahase kuvalingilako numba tuvyuma twatundende. Esekenu kuvalingilako vyuma vyamwaza vyakufwana nge vino:

• Kuvakwachilako kuchikolo, chipwe kuvasela chitwamo mwatwamanga yenu vatwameho nge muli mumunyau.

• Esekenu kuhajika navo numba tuhu kavatachikiza kanawa lilimi lyenuko.

• Undenu muchima kachi nge navalinga vyuma vize navimivwisa kupihya.

• Vevwilenu keke kachi nge navahanjika haukalu wavo.