Kachi nge katweshi kulikata navatu vaze katwazanga chikumako, kaha nachitulingisa tupwenga namuchima wakuvamona ulumbi. Kaha nawa nge natulikata navatu vaze vakwechi chisemwa chimwe nayetu, kaha tunahase kumona nge jila tweji kushinganyekelangamo nakulingilamo vyuma yikiko kaha yakwoloka.

“Kasununenu chikuma michima yenu.” —WAVAKA-KOLINDE 2, 6:13.

Uno chisoneka kana chalumbununa ika? Lizu ‘muchima’ lyatalikisa kukuzanga vakwetu namujila tweji kuvamwenangamo. Kachi nge natuzanganga kaha vatu vaze vakwechi chisemwa chimwe nayetu, kaha nachilumbununa nge katwakasunwine muchima wetu chipwe ngwetu tuli namuchima waupi. Hakusaka tuhonese ukalu kana, twatela kutunga usepa navatu vakuvisemwa vyeka.

Nge natuzanga vakwetu, kaha natutachikiza kanawa ovyo vyeji kuvalingisanga valinge vyuma mujila yeka. Kaha nge natuzanga chikuma vatu kana, kaha natuvamona jino ngwetu tuvosena twafuma kutanga yoyimwe. Natuvamona nawa kupwa vavalemu chikuma nakuwahilila navo hamwe chipwe kulishonena navo hamwe nge vali muukalu.

Talenu chakutalilaho chaNazaré. Hakavanga amwenenga vatu vakufuma kumafuchi eka ulumbi. Nazaré alumbunwine ovyo vyamukafwile echenga kuvamona ulumbi, ambile ngwenyi: “Ngwashikaminenga navatu kana nakuzachila navo hamwe. Ngwamwene jino ngwami vatu kana kavapwile nge muze vashinganyekele vatu vavavuluko. Kachi nge namulikata navatu vakuvisemwa vyeka, kaha kamweshi kuvamona ulumbiko, oloze namuvazanga chikuma nakuvamona kupwa vavalemu.”

Wanenungako lwola lwakushimutwilanga navatu vaze vafuma kumafuchi eka, navisemwa vyeka, chipwe vaze vahanjika malimi eka. Munahase:

• Kuvahulisa vamilwezeko vyachiyoyelo chavo.

• Kuvasanyika mulyenga navo hamwe vyakulya.

• Kwivwilila kuvyuma navamilweza nakutachikiza nawa vyuma vize vamona kupwa vyavilemu.

Kachi nge namutachikiza vyuma vanahichimo mukuyoya chavo nomu vinalumuna vilinga vyavo, echi nachimilingisa muzange vatu vakuchisemwa kana.