Vatu vanahase kuvamona ulumbi mwomwo yakulifuchi vafuma, navikova, namiyachi, namalimi, naluheto chipwe mwomwo yakulihandununa chamauka akwitava chipwe mwomwo yakupwa lunga chipwe pwevo. Vatu vamwe veji kumonanga vakwavo ulumbi mwomwo yamyaka yakusemuka, nashikola vatanga, nautonji chipwe mwomwo yasolokeso yavo. Oloze vavene veji kushinganyekanga ngwavo kavamona vakwavo ulumbiko.

Kutala nayenu mukwechi muchima wakumona vakwenu ulumbi tahi? Etu vamwe chapwa chachashi kutachikiza ngwetu vakwetu vatwama namuchima wakumona vakwavo ulumbi, oloze chinahase kupwa chachikalu kulitachikiza etu vavene ngwetu nayetu tukwechi muchima kana. Kuhanjika muchano, tuvosena tweji kumonanga vakwetu ulumbi mujijila jimwe. David Williams, mutu uze alinangula chikuma vyachiyoyelo chavatu, ambile ngwenyi: “Kachi nge mutu mwahunga vatu vamwe, jino nge mwawana mutu umwe wahalizavu lyavatu vaze ahunga kaha eji kulumbilisanga mutu kana chakuzeneka ikiye kutachikiza ngwenyi ali nakumumona ulumbi.”

Chakutalilaho, Jovica uze atwama mungalila muze mwatwama muyachi umwe uze vatu vavavulu vahunga chikuma, ambile ngwenyi: “Ngwashinganyekelenga ngwami atela vatu kana kavatwama namuchima wamwazako, chipwe ngocho kangwatachikijile ngwami nguli namuchima wakumona vatu ulumbiko mwomwo ngwalyambilenga ngwami vyuma nguli nakuhanjika hali vakiko vyamuchano.”

Jifulumende jajivulu jahakako jishimbi jakukanyisa vatu vahonenga kumona vakwavo ulumbi. Chipwe ngocho kulimona ulumbi kachakumineko. Mwomwo ika? Mwomwo jishimbi kana jeji kuhanjikanga kaha havilinga atela kupwa navyo mutu. Oloze kajeshi kuhasa kwalumuna vishinganyeka vyamutuko. Kulimona ulumbi cheji kuputukilanga mumuchima wamutu namuvishinganyeka vyenyi. Kutala vatu vanahase kufumisako muchima wakumona vakwavo ulumbi tahi? Vyuma muka vinahase kutukafwa mangana tuhonese muchima kanou?