Uno melu namavu navyuma vyakuyoya valingile vyakutenga kuli Kalunga tahi, nyi vyalijilile vivene? Mazu vahanjikile ava malunga valinangula vyakutenga akumbulula echi chihula mujila yize yalihandununa nomwo vachikumbulula mumazu amaputukilo muMbimbiliya. Vatu vamwe vafwelela evi vishinganyeka vyavava malunga, veka vafwelela vyuma yahanjika Mbimbiliya. Oloze vavavulu kavatachikiza ovyo vatela kufwelelako. Vatu veji kulipulanga jipami hachihande kana mumikanda, nahavisaji vyahapeho, nahavisaji vyamivwimbimbi.

Pamo milongeshi jenu vamilwezele hatoma ngwavo melu namavu navyuma vyakuyoya vyalijilile vivene, kakwatwama Tengi uze avitengeleko. Uno milongeshi jenu vamihanyine unjiho wakusolola nge kakwatwama Tengiko tahi? Pamo nawa mwevwaho lyehi vatwamina vamukwitava navanangula ngwavo, chikupu vene kwatwama Tengi. Kutala vamihanyine unjiho wakukundwiza vyuma vamilwezele tahi? Nyi vamilwezele kaha ngwavo mwatela kufwelela ngwenu kwatwama Kalunga chakuzeneka kumihana unjiho?

Pamo nayenu mwashinganyekaho lyehi hachihula kana, nakumona ngwenu kakweshi mutu mwahasa kuhana unjiho wakusolola nge kwatwama Tengiko. Kaha nawa pamo mwalihulishile ngwenu, Uno chapwa chachilemu kutachikiza muvakumbulwila chihula kana tahi?

Yino mangazini yaTonenu! nayivangila kuhanjika haunjiho uze unalingisa vatu vavavulu vafwelele ngwavo kwatwama Tengi. Kufumaho, nayilumbununa ovyo chapwila chachilemu kutachikiza omwo vyaputukile vyuma vyakuyoya hano hamavu.