Chapwa Chachilemu Kutachikiza Ngwetu Kwatwama Tengi
Mwomwo ika chapwila chachilemu kutachikiza ngwetu kwatwama Tengi? Nge namufwelela unjiho wakusolola nge kwatwama Kalunga wangolo josena, kaha pamo munahase kusaka kutachikiza unjiho wakusolola nge Mbimbiliya vayihwima kuli ikiye. Kaha kufwelela vyuma yahanjika Mbimbiliya, nachimikafwa mujijila jino:
Namulivwisa kuwaha kuyoya
MBIMBILIYA YAHANJIKA NGWAYO: “[Kalunga alingile] mwamwaza, hakumihana vula kufuma mwilu, najingonde jakwima mihako, nakumihana vyakulya nakusuulwisa michima yenu.”—Vilinga 14:17.
OMWO CHALUMBUNUKILA: Vyuma vyosena mweji kulivwisanga kuwaha muno mukaye hiwana wakuli Tengi. Namusakwilila chikuma owo amihanawo nge namutachikiza ngwenu amizakama.
Namuwana jindongi jakumitwaminyina
MBIMBILIYA YAHANJIKA NGWAYO: “Nautachikiza nawa omu chapwa kwoloka, nomu mwaya chiyulo, nakusungama, chipwe ngwetu jijila jamwaza josena.”—Vishimo 2:9.
OMWO CHALUMBUNUKILA: Hakuwana nge Kalunga apwa Tengi yenu, atachikiza vyuma navimilingisa muwahilile. Nge namutanganga Mbimbiliya kaha namulinangula vyuma vize navimikafwa.
Namuwana muvakumbulwila vihula vyenu
MBIMBILIYA YAHANJIKA NGWAYO: “[Namupwa] nachinyingi chakumutachikiza Kalunga.”—Vishimo 2:5.
OMWO CHALUMBUNUKILA: Kutachikiza ngwenu Tengi kwatwama nachimikafwa muwane muvakumbulwila vihula vino vyavilemu navihula vyeka: Mwomwo ika tweji kuyoyelanga? Mwomwo ika kuyanda chinavulila ngana? Vyuma muka vyeji kusolokanga kuli mutu nge nafu? Mbimbiliya yakumbulula kanawa vihula kanevi.
Namutalilila vyuma vyamwaza kulutwe
MBIMBILIYA YAHANJIKA NGWAYO: “Yehova nambe ngwenyi, ‘Ngunatachikiza vyuma nguli nakushinganyeka hali enu. Nguli nakushinganyeka kumitwamisa mukuunda, keshi kuminehela lupiko, mangana mukayoye kanawa kulutwe nakupwa nalutalililo.’”—Yelemiya 29:11.
OMWO CHALUMBUNUKILA: Kalunga ashika ngwenyi mwakafumisako upi nakuyanda nakufwa. Nge namufwelela jishiko jaKalunga, kaha namumika mukala ukalu namumona mwomwo yakutalilila vyuma vyamwaza kulutwe.
Pamo Nauzanga Nawa
TONENU
Mwakupwila Vakuwahilila—Ovyo Tweji Kuyoyelanga
Kuwana muvakumbulwila vihula vyavilemu vyamukuyoya chapwa chachilemu kaha cheji kutulingisanga tupwenga vakuwahilila.
