Uno vaka-sayasi vatachikiza omwo aputukile melu namavu navyuma vyakuyoya tahi? Kukumbulula ngwetu nduma. Vatu vamwe vamba ngwavo vaka-sayasi vaze valinangula vyuma vyamumelu nahamavu vanahase kulumbununa omwo vyaputukile vyuma kana. Oloze Marcelo Gleiser mutu uze alinangula chikuma vyamumelu wahashikola yaDartmouth ambile ngwenyi: “Katwahasa kulumbununa omwo aputukile melu namavuko.”

Kaha nawa chihande chimwe chamumangazini yaScience News chahanjikile hamaputukilo akuyoya ngwacho: “Kakweshi mutu mwahasa kulumbununa kanawa omwo vyaputukile vyuma vyakuyoya hano hamavuko. Malolwa navifuwa vyakushikulu vize vyatela kutukafwa tutachikize vyuma vyasolokele vyalala lyehi.” Vyuma vyosena evi vinasolola nge vaka-sayasi kanda vatachikize omwo aputukile melu namavu navyuma vyakuyoya.

Munahase kulihulisa ngwenu, ‘Kachi nge vyuma vyakuyoya hano hamavu valingile vyakutenga, kaha iya avitengele?’ Munahase nawa kulihulisa ngwenu: Nge kwatwama Tengi wazangi namangana, kaha mwomwo ika mwechelela vatu vaze atenga vayande? Mwomwo ika mwetavishila kupwenga mauka akwitava amavulu? Mwomwo ika mwechelela vaka-kumulemesa valingenga vyuma vyavipi vyavivulu?’

Vaka-sayasi kaveshi kuhasa kukumbulula vihula kanako. Oloze echi kachalumbunwine nge kamweshi kuhasa kuwana muvakumbulwila vihula kana mujila yize nayimisuulwisako. Tachikizenu ngwenu vatu vavavulu vanawane muvakumbulwila vihula vyavo muMbimbiliya.

Nge muli nakusaka kutachikiza ovyo vaka-sayasi vamwe vaze vanalinangulanga Mbimbiliya vafwelela ngwavo kwatwama Tengi, kaha yenunga ha jw.org. Yenu haze vanasoneka ngwavo “vyuma vashinganyeka vatu kupandama kumaputukilo akuyoya.”