Hanjikiso yimwe yamba ngwayo, mweji kuhitanga makumbi 21 numba mutu alinge vyuma vyamwaza nasakula. Oloze vaka-kuhehwojola vanawane nge vatu vamwe veji kupwanga navilinga vyamwaza hahaze vene, kaha vakwavo veji kupwanga navilinga kana mukihita chalwola. Uno chuma kana chatela kumifutwisa kumuchima tahi?

Achishinganyekenu hachakutalilaho chino: Twambenga ngana ngwetu munakusaka kulinyukanyuka kumujimba katatu muchalumingo.

• Chalumingo chatete, namutesamo vyuma munalitomena.

• Chalumingo chamuchivali, namulinyuka kaha kavali.

• Chalumingo chamuchitatu, namutesamo cheka.

• Chalumingo chamuchiwana, namulinyuka kaha kamwe.

• Chalumingo chamuchitanu, namutesamo cheka, kaha kufumaho namuputuka kutesamo chalumingo hichalumingo.

Munambate vyalumingo vitanu numba mwijilile kulinga vyuma mwalitomenene. Tando kana yinasoloka nge yayisuku chikuma oloze omu namutesamo chuma kana namuwahilila chikuma mwomwo muli jino natato yamwaza.

Mbimbiliya yatukolezeza tupwenga nalukakachila. Chuma chachilemu shina mapapa tunakatuka keshi mapapa tunalimbukako.

• Kamwatela kukukulula ngwenu nge munalimbuka kamwe, kaha kunahu kamweshi kukecha tato kanako. Ijivenu ngwenu namuhonanga kutesamo vyuma munakufwila kulinga.

• Shinganyekenu mapapa kangahi munalingi vyuma vyakwoloka. Chakutalilaho, nge munakusaka kwalumunako jila mweji kuhanjikilangamo navana venu, kaha lihulisenu ngwenu: ‘Lwola muka ngwashinganyekele kutenukila vana hakuzachisa mazu amapi, oloze ngwaunjile? Vyuma muka ngwalingile muchishishisa chakutenuka? Ngunahase cheka kulinga ngachilihi ngocho?’ Vihula vyangana vinahase kumikafwa mufukile muchishishisa chakushinganyeka hakulimbenja chenu.

Kutala munakusaka kutachikiza omu jindongi jamuMbimbiliya jinahase kumikafwa muvyuma vyeka vyamukuyoya vyakufwana nge, mwakuhonesela kulizakamina, namwakupwila vakuwahilila chipwe kupwa vakuwahilila mutanga yenu tahi? Lwezenu kala Chinjiho chaYehova amikafwe mutachikize jindongi kana, chipwe yenu hakeyala yetu ya jw.org.