CHIHANDE CHACHINENE | MWAKUPWILA NATATO YAMWAZA
2. Lihendenu kuVyuma Navimihonesa Kulinga Vyuma Vyakwoloka
-
Munakufwila kuputuka kulya vyakulya vyamwaza, oloze omu namumona ice cream haze, kaha namuchima vene hepu.
-
Munakufwila kwecha kunwa makanya, oloze sepa lyenu mwamihana cheka musanga wamakanya okunyi natachikiza ngwenyi muli nakusaka kwecha.
-
Munakusaka kulinyukanyuka kumujimba, oloze kumbata kaha sapato jakulahisa muchisweko namuchimona kupwa himulimo waukalu chikuma.
Kutala munamono ukalu uli muvishina vitatu tunavuluka tahi? Vyuma tunavuluka vinasolola nge vyuma vyatujingilika chipwe vatu tweji kulikatanga navo vinahase kutulingisa tuhone kupwa navilinga vyamwaza nakwecha jitato jajipi.
LUSHIMBI LWAMUMBIMBILIYA: “Muka-kuzangama eji kumonanga ponde, kaha himwaswama, oloze ou azeneka chinyingi mwalitakaho nakumona lupi.”—Vishimo 22:3.
Mbimbiliya yatukolezeza tushinganyekenga havyuma vyakulutwe. Nge natulinga ngocho, kaha nachitukafwa tulihende kuvyuma vize navitulingisa tuhone kutesamo vyuma tunakusaka kulinga. (WaChimoteu 2, 2:22) Mukavatu tunakwamba ngwetu, lihendenu kuvyuma navimihonesa kulinga vyuma vyakwoloka.
Mbilenu vyuma vize navimihonesa kulinga vyuma vyakwoloka nakulinga vize navimikafwa mulinge vyuma vyamwaza
VYUMA MWATELA KULINGA
-
Mbilenu vyuma vize navimilingisa muhone kulinga vyuma vyakwoloka. Chakutalilaho, nge munakusaka kulitwamina kulya vyakulya vize vinahase kuminehela ukalu, kaha kamwatela kulama vyakulya kana muzuvo yenuko. Kahechi nachimikafwa muhone kulya vyakulya kana numba nge munevu chipepa.
-
Lingenu vyuma vize navimikafwa mulinge vyuma vyakwoloka. Chakutalilaho, nge munakusaka kulinyukanyuka kumujimba nachimene, kaha mwatela kutumbikila chimweza uvwalo wakuzachisa kwakamwihi nakahela kenu shimbu kanda musavale. Nge namupwa nachijililo kana kaha nachimyashiwilanga kulinga ngocho.
-
Mwatela kusakula kanawa masepa. Masepa vaze natulikata navo vanahase kutulingisa tulondezeze vilinga vyavo. (Wavaka-Kolinde 1, 15:33) Ngocho mwatela kulitwamina kupwanga navatu vaze navamilingisa mukindulukile kujitato muli nakusaka kwecha, nakupwanga navaze navamikafwa mupwenga navilinga vyamwaza.
