Chinahase kumikaluhwila kwalumuna vyuma vyosena mukuyoya chenu halwola lwolumwe. Munahase kwamba ngwenu, ‘Chalumingo chino nangulitwamina kunwa makanya, nakutukana, nakukotokela kusavala. Oloze nanguputuka kulinyukanyuka kumujimba, nakulya vyakulya vyamwaza nakutuminanga shinga vakaka.’ Uno chapwa chachashi kutesamo vyuma munasakula halwola lwolumwe tahi?

Mutu wakulikehesa eji kulitomenanga vyuma vize mwahasa kutesamo. Atachikiza ngwenyi keshi nalwola lwaluvulu chipwe ngolo jajivulu, navyuma vyavivulu vyasakiwako. Shikaho muchishishisa chakufwila kwalumuna vyuma vyosena halwola lwolumwe, eji kuzachilanga havyuma kana chikoki chikoki.

Zachilenu hatato yenu chikoki chikoki. Jijila jinakavangizaho najimikafwa:

1. Mbatenu mapapilo avali. Halipapilo limwe sonekenuho jitato jamwaza munakusaka kulinga, kaha halipapilo likwavo sonekenuho jitato jajipi jize munakusaka kwecha. Munahase kusonekaho vyuma vyavivulu vize namwanuka.

2. Putukilenu navyuma vyavilemu hakuhakako jinambala.

3. Sakulenuho chuma chimwe chipwe vivali hamapapilo osena, nakuzachilaho. Kaha kufumaho munahase cheka kusakulaho vyuma vikwavo.

Hakusaka chimyashiwile, shishisenu tato yayipi natato yamwaza. Chakutalilaho, nge halipapilo lili najitato jajipi munasonekaho tato yakutalanga chikuma TV kaha nawa havyuma vyamwaza munasonekaho kushimutwilanga namasepa navausoko, kaha munahase kufwila ‘kuzachisa lwola mweji kutalanga TV nge munakutoka kumilimo nakushimutwila namasepa navausoko wenu.’