Mbimbiliya kayahanjika ngwayo chapwa chakwoloka vatu vausonyi umwe kulimbatako. Oloze chihula chachilemu shina echi, Vyuma muka yahanjika Mbimbiliya kutalisa kukulisavala chavatu vausonyi umwe?

Vatu vavavulu vashinganyeka ngwavo vatachikiza mwakukumbulwila chihula kanechi oloze vyuma vakumbulula vyalimbalaka mwomwo kavakekesa vyuma yahanjika Mbimbiliyako. Vamwe vamba ngwavo Mbimbiliya yakanyisa kulisavala chavatu vausonyi umwe. Kaha nawa veka vamba ngwavo hakuwana nge Mbimbiliya yatulweza ‘tuzangenga vakwetu,’ ngocho yakundwiza kulisavala chavatu vausonyi umwe naujila.—Wavaka-Loma 13:9.

Hali eyi mikuku yinakavangizaho, mukuku muka namwamba ngwenu wamuchano?

1. Mbimbiliya yakanyisa kulisavala chavatu vausonyi umwe.

2. Mbimbiliya yetavisa kulisavala chavatu vausonyi umwe.

3. Mbimbiliya yakundwiza kumona ulumbi vatu vaze veji kulisavalanga navatu vausonyi umwe.

KUKUMBULULA:

1. MUCHANO. Mbimbiliya yahanjika ngwayo: “Malunga vaka-kusavala vakwavo malunga . . . kaveshi kukaswana Wangana waKalungako.” (Wavaka-Kolinde 1, 6:9, 10) Mazu kana atalisa nakumapwevo.—Wavaka-Loma 1:26.

2. MAKULI. Mbimbiliya yanangula ngwayo kulisavala chapwa chalunga napwevo vaze valimbata.—Kuputuka 1:27, 28; Vishimo 5:18, 19.

3. MAKULI. Mbimbiliya yakanyisa kulisavala chavatu vausonyi umwe, kaha nawa kayakundwiza vilinga vyakumona vatu ulumbi, nauhwanga, chipwe kuyanjisa vatu vaze veji kulisavalanga navatu vausonyi umweko.—Wavaka-Loma 12:18.

Vinjiho jaYehova vafwelela jishimbi jamuMbimbiliya kupwa jakwoloka, kaha vafwila kujikavangiza mukuyoya chavo chosena. (Isaya 48:17) Echi chalumbununa nge Vinjiho jaYehova vahunga vilinga vyosena vyauvumbi kuhakilako vene nakulisavala chavatu vausonyi umwe. (Wavaka-Kolinde 1, 6:18) Echi chikiko chiyoyelo valisakwila Vinjiho jaYehova, kaha vakwechi lisesa lyakuyoya mujila kana.

Kaha nawa Vinjiho jaYehova vafwila “kutwama mukuunda navatu vosena.” (WavaHepeleu 12:14) Vinjiho jaYehova kavakundwiza vilinga vyakulisavala chavatu vausonyi umweko kaha nawa kavashinjila vakwavo valinge vyuma vafwelelako, chipwe kukundwiza vatu vamona ulumbi vaze veji kulisavalanga navatu vausonyi umweko chipwe kuwahilila nge navevwa mijimbu yavatu kana. Vinjiho jaYehova vafwila kumona vakwavo ngana muze vasaka vakwavo vavamonenga.—Mateu 7:12.

Vatu vamwe nawa vanahase kwamba ngwavo, Mbimbiliya yakundwiza kumona ulumbi vaze veji kulisavalanga navatu vausonyi umwe, kaha vaze veji kuyikavangizanga vapwa vavakalu michima. Kaha nawa veji kwambanga ngwavo, ‘Mbimbiliya vayisonekele mulwola luze vatu kavapwile nachinyingi chikumako. Makumbi ano, tweji kwitavilanga vatu vakumiyachi yakulisezaseza, navaka-mafuchi, navaze vamona kulisavala chavatu mujila yakulisezaseza.’ Vatu kana vamona nge kukana kulisavala chavatu vausonyi umwe chapwa chochimwe nakukana vatu vavikova vyakulisezaseza. Uno vishinganyeka kana vyakwoloka tahi? Nduma. Mwomwo ika?

Mwomwo hatwama chihandwa hakukana vilinga vyakulisavala chavatu vausonyi umwe nakukana vatu kana. Mbimbiliya yalweza vaka-Kulishitu vavumbikenga vatu vosena. (WaPetulu 1, 2:17) Oloze kachalumbununa nge vaka-Kulishitu vatela kwitavila vilinga vyavatu vosenako.

Achitalenu hachakutalilaho chino: Twambenga ngana ngwetu mwamona kunwa makanya kupwa chachipi kaha nawa chaunyengwe. Nyi ngachilihi nge mutu mwazata nenyi eji kunwanga makanya? Kutala mwamimona nge kamwatwama namangana mwomwo kamwanwa makanyako tahi? Hakuwana nge ikiye eji kunwanga makanya oloze enu kamwawanwako, kutala mwashinganyeka ngwenyi mwamumona ulumbi tahi? Nge mutu kana mwamikanjikiza munwenga makanya, kutala keshi kusoloka nge katwama namanganako kaha nawa wamukalu muchima nyi?

Vinjiho jaYehova vafwila kutwama kweseka namwaya jishimbi jamuMbimbiliya. Kavetavila vilinga vize Mbimbiliya yakanyisako. Oloze kavahunga chipwe kuyanjisa vatu vaze veji kulinganga vyuma vize kavalinga vakikoko.

Nyi ngachilihi vatu vaze vakwechi muchima wakufwila kulisavala navatu vausonyi umwe? Uno vasemukile namuchima kanou tahi? Nge mukiko, kaha kacheshi kupwa chakuhenga kwamba ngwetu vatela kwalumuna vishinganyeka vyavoko nyi?

Mbimbiliya kayahanjika havyuma vyeji kulingisanga vatu vapwenga namuchima wakufwila kulisavala navatu vausonyi umweko, oloze yasolola nge vatu vamwe vakwechi tato yayikalu kumbila. Chipwe ngocho, Mbimbiliya yamba ngwayo, nge tunakusaka kwivwisa Kalunga kuwaha, kaha twatela kwecha vilinga vyavipi vyakufwana nge kulisavala chavatu vausonyi umwe.—Wavaka-Kolinde 2, 10:4, 5.

Veka vanahase kwamba ngwavo vyuma yahanjika Mbimbiliya vyapwa vyakuhenga. Oloze vyuma veji kuhanjikanga vyapendamina havyuma veji kushinganyekanga vyakwamba ngwavo twatela kulinga kweseka nomu tuli nakwivwa chipwe kweseka nomu anakwivwa mutu kumujimba wenyi chakuzeneka kulikanyisa. Oloze Mbimbiliya yavumbika vatu hakwamba ngwayo vakwechi ngolo jakulikanyisa vavene. Vatu kavapwa ngana mwatunyama vaze veji kuhonanga kulikanyisa vavene hakulinga vyuma vyavipiko.—Wavaka-Kolose 3:5.

Achishinganyekenu havyuma vimwe vino: Vatu vamwe vaze valinangula chikuma vamba ngwavo vilinga vyakufwana nge kutenuka chikuma vinahase kupwa vyuma vize asemuka navyo mutu. Mbimbiliya kayahanjika hatoma vyakusemuka  nautenuko, oloze yahanjika ngwayo vatu vamwe veji ‘kukwatanga washi matoto nakukwata washi kulundundu.’ (Vishimo 22:24; 29:22) Mbimbiliya yamba nawa ngwayo: “Mbila utenu, seza matoto.”—Samu 37:8; Wavaka-Efwesu 4:31.

Vatu vamwe vanahase kukana mazu kana awa chipwe kwamba ngwavo awa mazu kawapwa amwaza kuli vaka-kukwata washi utenuko. Vatu valinangula chikuma twavulukanga, vaze nawa vafwelela ngwavo matoto apwa akusemuka nawo, navakiko veji kukafwanga vatu vakeheseko muchima wamatoto.

Vinjiho jaYehova navakiko veji kukafwanga vatu vaze veji kulinganga vyuma vyalimbalaka naMbimbiliya. Veji kuhuhumunanga vatu vamona kulisavala chavatu vausonyi umwe kupwa chakwoloka navaze veji kulinganga ujila. Mbimbiliya yahuhumuna vatu vavilinga kana ngwayo: “Mutu himutu atachikize mwakulamina mujimba wenyi ivene mukujila namukavumbi, keshi nachipululu napeha yayipi yakusaka kulisavalako.”—Wavaka-Tesolonyika 1, 4:4, 5.

Vosena vaze vafwililile kwalumuka nakupwa vaka-Kulishitu mulikulukaji lyamyaka lyakulivanga vafumine kuvisemwa vyakulisezaseza naviyoyelo vyakulihandununa handununa, ngocho vamwe valumwineko viyoyelo vyavo. Chakutalilaho, Mbimbiliya yahanjika hali “vaka-ujila, navaka-kulemesa makombelo, navaka-ukoji, namalunga valihana vavasavale kuvakwavo malunga,” kaha yatwalaho lika nakwamba ngwayo: “Omu mukiko mumwapwilenga nayenu vamwe.” —Wavaka-Kolinde 1, 6:9-11.

Uno Mbimbiliya hakwamba ngwayo, “omu mukiko mumwapwilenga nayenu vamwe,” kutala yalumbununa nge vatu vaze vechele vilinga vyakulisavala chavatu vausonyi umwe kavapwile cheka namuchima wakufwila kulinga vyuma kanako tahi? Kacheshi kuhasa kupwa ngochoko mwomwo Mbimbiliya yahanjika ngwayo: “Tambukenunga nashipilitu, kaha kamweshi kukalinga mwaya kufwila chamujimbako.”—Wavaka-Ngalesha 5:16.

Nyingililenu ngwenu Mbimbiliya kayahanjika ngwayo muka-Kulishitu keshi kuhasa kushinganyeka vyuma vyavipiko. Oloze yahanjika ngwayo atela kulihenda kukulinga vyuma kana. Vaka-Kulishitu vatela kukana vishinganyeka vyavipi nakulihenda kukulinga vyuma vanashinganyeka.—WaYakova 1:14, 15.

Ngocho Mbimbiliya yasolola chihandwa chatwama hakushinganyeka havyuma vyavipi nahakuvilinga. (Wavaka-Loma 7:16-25) Mutu atwama natato yakulisavala navatu vausonyi umwe nahase kukanyisa muchima wenyi kushinganyeka chikuma havyuma kana nge muze mwakanyisa muchima wenyi kushinganyeka havyuma vyeka vyavipi vyakufwana nge, matoto, naujila nachipululu.—Wavaka-Kolinde 1, 9:27; WaPetulu 2, 2:14, 15.

Numba tuhu Vinjiho jaYehova vafwila kukavangiza jishimbi jamuMbimbiliya, oloze kavakanjikiza vakwavo vakavangize jishimbi kanako. Chipwe kwalumuna jishimbi jize jakinga kuyoya chavatu vaze vatwama nachiyoyelo chize chalihandununa nachavoko. Mujimbu veji kwambululanga Vinjiho jaYehova wapwa wamwaza kaha nawa vafwila kulwezako vatu vaze navasaka kuvevwilila.—Vilinga 20:20.