• Milimo azata chisemi chove walunga yinakusakiwa tanga yenu kwalukila kuchihela cheka.

• Sepa lyove wazanga chikuma ali nakwalukila kwakusuku.

• Yayove ali nakwingila muulo.

Naulinga ngachilihi nakwalumuka kanechi?

Mutondo uze naulizemba napeho unahase kuyovoka kupeho yanyamanganda. Ngana mwamutondo kana, nayenu munahase kwitavila vyuma vinalumuka vize kamweshi kuhasa kwalumunako. Shimbu kanda tuchishimutwile vyavivulu, achishinganyekenu havyuma vyeji kusolokanga nge vyuma vinalumuka.

Katwatwama nangolo jakwalumuna vyuma vinalumukako. Mbimbiliya yahanjika chishina chino chachinene kutalisa kuvatu ngwayo: “Vyuma vyakwiza mukukasumuna vyeji kuvawananga vosena.” (Muka-kwambulula 9:11) Kala lwola vyuma vinahase kwalumuka mukuyoya chetu. Shikaho vyuma vyakwiza mukukasumuna vyosena kavyapwa vyavipiko. Vyuma vimwe vize vinahase kusoloka hakavanga nge vyavipi, vinahase kutunganyalisa mukuhita chalwola. Chipwe ngocho, vatu vavavulu kavasaka vyuma vyalumukeko numba nge kulinga ngocho nachivanganyalisa chipwe nduma.

Kwalumuka chavyuma cheji kulingisanga vakweze vahombe. Mwomwo ika? Mukweze Alex ambile ngwenyi: “Oholili ngana kuli vyuma vimwe vinakwalumuka mumujimba wenu. * Kwalumuka chavyuma mukuyoya chenu cheji kuwezelangako kuukalu kanou.”

Chuma chikwavo shina echi: Nge vyuma vimwe vinalumuka, vakulwane veji kuvangila kushinganyeka havyuma vanahichimo mukuyoya chavo, mangana vawane muvakumishilile ukalu kunyima. Oloze vakweze kavatwama navyuma vyavivulu vize vanahichimo mukuyoya chavoko.

Mwatela kwitavila vyuma vinalumuka. Lukakachila lwapwa kumika nakwitavila kala vyuma vinalumuka mukuyoya chenu. Mutu walukakachila eji kumikanga muvyuma vinalumuka mukuyoya chenyi nakukekesa havyuma kana amone numba nge muliko kuwaha chimwe. Kakavulu vakweze valukakachila kaveshi kunwa maundu akupendesa chipwe wala nge vyuma vimwe vinalumukako.

Mwatela kwitavila vyuma vinasoloka. Chikupu vene mwasaka kwolola vyuma vyosena mukuyoya chenu, oloze kachapwa chachashiko. Masepa jenu vanahase kwalukila kweka chipwe kwingila muulo, vasongo jenu chipwe vayayenu vaze vanakolo vanahase kufuma hembo. Kwalumuka chavyuma mukuyoya chenu chinahase kumilingisa mwalukile kuchihela cheka natanga yenu chipwe kuseza masepa jenu navyuma vyeka. Chapwa chakutamo kwitavila vyuma vinasoloka kuhambakana kwechelela vishinganyeka vyavipi vimihombese.—Lushimbi lwamuMbimbiliya: Muka-kwambulula 7:10.

Talililenu vyuma vili kulutwe. Kushinganyeka havyuma vyakunyima chinapu nge mutu uze anakutambukisa minyau oku hanga nashishikila muchitalilo amone vinakwiza kunyima. Shimbu jimwe chapwa chachilemu kutala muchitalilo, oloze nge muli nakutambukisa minyau, mwatela kushishika kuze munakuya. Omu mukiko chapwa nge vyuma vimwe vinalumuka mukuyoya chenu. Shishikenu kaha meso enu havyuma vili kulutwe. (Vishimo 4:25) Chakutalilaho, vyuma muka munakufwila kulinga mutukweji vali kulutwe?

Shinganyekenu hakuwaha chilimo. Mwanapwevo walijina lyaLaura ambile ngwenyi: “Kupwa nalukakachila chapendamina hamuchima wamutu. Nge vyuma vinalumuka, kaha mwatela kushinganyeka hakuwaha chilimo.” Kutala munahase kusoneka chuma chimwe chamwaza chize chinamivwisa kuwaha omu vyuma vinalumuka tahi?—Lushimbi lwamuMbimbiliya: Muka-kwambulula 6:9.

Mwanapwevo walijina lyaVictoria ambile ngwenyi, omu apwile kanyike masepa jenyi vosena valukilile kujingalila jeka. Atwalileho ngwenyi, “Ngwevwilenga chikuma uli, kaha ngwashinganyekele ngwami kachi vyuma kavyalumukileko. Oloze ngwatachikijile ngwami ngwaputukile kukola. Ngwamwene jino ngwami kukola cheji kwizanga mwomwo yakwalumuka chavyuma. Hakiko ngwaputukile kutunga masepa veka vaze vapwile mungalila ngwapwile.”—Lushimbi lwamuMbimbiliya: Vishimo 27:10.

Kafwenunga vakwenu. Mbimbiliya yahanjika ngwayo: “Kanda kuhakanga kulutwe vyuma mwasaka enu kahako, oloze navyuma vasaka vakwenu nawa.” (Wavaka-Fwilipi 2:4) Vyuma navimikafwa muhonese ukalu wenu shina kukafwa vakwenu nge vali muukalu. Anna wamyaka yakusemuka 17 ambile ngwenyi: “Omu ngwapwilenga nakukola ngwamwenenga ngwami kukafwa mukwetu uze anakumona ukalu ngana uze wayami chipwe wakuhambakanaho, changusuulwishilenga.”