MBANGALALA, apwa katutu uze alifwana nambimba, kaha eji kuwanyiwanga mumatungu osena kufumisako kaha litungu lyaAntarctica. Vambangalala vakumututuko waAmerica, vapwa vakulipwila chikuma mwomwo vasuulwisa vaka-sayasi.

Achishinganyekenu hachumechi: Mayevuyevu avambangalala veji kusolokanga kaha havyalumingo vyavindende mungonde yanonga. Hatando yayindende yize veji kutwamanga haweluka nge vanavumbuka, veji kulyuununanga, nakuputuka kuteza, nakutuka, nakusema, kaha kufumaho veji kufwanga. Mweji kuhitanga myaka 13 chipwe 17 numba chisemunwino chikwavo chikasoloke kweseka namuyachi wavambangalala kana. Vyuma muka vyeji kusolokanga kutututu kana mulwola kanelu?

Chatete, twatela kutachikiza tando eji kuyoyanga mbangalala. Omu mweji kuhitanga chalumingo chimwe kufuma haze veji kuvumbukanga, vambangalala vavilunga veji kunyinanga vavihwevo nakuvasemesa maulu akuheta ku 400 na 600. Maulu kana veji kuwasemenanga hamitango, kufumaho veji kufwanga. Nge munahichi vyalumingo vyavindende, aze maulu eji kutetukanga, kaha tuvana tweji kuholokanga nakuvumbama mumavu nakunwa meya akumiji yamitondo hamyaka yayivulu. Nge munahichi myaka 13 chipwe 17, vaze vana veji kuvumbukanga jino nakuputuka kuyoyela haweluka.

Chihande chimwe chamumangazini yaNature, chahanjikile kutalisa kuchiyoyelo chavambangalala ngwacho, ava tututu “vanajingulwisa vaka-sayasi wongo hamyaka yayivulu. . . . Kaha noholili vatu vaze valinangula vyatututu vachili lika nakufulyangila vawane omu chapwa chiyoyelo chatututu kana.” Kuyoya chavo chapwa chakulipwila chikuma hatunyama vosena.

Enu munashinganyeka ngachilihi? Uno kuyoya chambangalala chalijilile chivene tahi nyi valingile chakutenga?