OMU YAHANJIKA MBIMBILIYA
Kuwaha chaMujimba
Kumona kusoloka chetu mujila yamwaza chinahase kutulingisa tupwenga vakuwahilila.
Mwomwo ika tweji kusuulukilanga nasolokeso yetu?
Wongo wamutu weji kutachikizanga kuwaha chamujimba mujila yakukomwesa. Mbimbiliya kayalumbununa omu wongo weji kulinganga ngochoko, oloze yasolola ovyo twazangila vyuma vyamwaza mwomwo tweji kusololanga vilinga vyaKalunga. (Kuputuka 1:27; Muka-kwambulula 3:11) Kalunga atengele nawa mujimba wamutu mujila yakulipwila nakuulingisa uzate mujila yakulisezaseza. Evi vikiko vyalingishile muka-kwimba wakushikulu asoneke ngwenyi: “Ngweji kukwalisanga mwomwo wangutenga mwakwivwisa woma, mwakukomwesa.”—Samu 139:14.
Makumbi ano, vaka-kutunga uvwalo navaka-kwazana mijimbu vali nakulingisa vatu vamone kusoloka chavo mujila yayipi. Mukanda waBody Image wamba ngwawo, vaka-kuhehwojola vavavulu vahanjikile hachisemwa chavatu vakumulauko ngwavo “kuwaha chamujimba wamutu chinahase kumulingisa alimone kupwa wamwaza chipwe nduma.” Vishinganyeka kana vinalingisanga vatu valiule vyuma vyavilemu vyakufwana nge muchima wamutu.—Samwele 1, 16:7.
Visemwa vyavivulu vyahaka chikuma mangana kusolokeso yamutu yize nayivwisa vatu peha
Tuyokutuyoku nawa, vatu vali nakuhakanga mangana kukuwaha chamutu chize cheji kunehanga peha, chikumanyi kuwaha chamapwevo. Mu 2007, liuka lyaAmerican Psychological Association (APA) lyahanyine mujimbu wakwamba ngwavo vaka-kwazana mijimbu “veji kusololanga mapwevo mujila yakwivwisa peha.” Kuli vyuma vyavilemu vyalingisa Mbimbiliya yituhuhumune tulihende kuvyuma kana.—Wavaka-Kolose 3:5, 6.
“Kuliwahisa chenu kanda chipwa chakuwelukako . . . , oloze chipwenga chakuwahisa mutu wakusweka wamumuchima, chakuvwala uvwalo wakuhona kupola washipilitu yayivwovu yakuunda, yize yandando yayinene kumeso aKalunga.”—WaPetulu 1, 3:3, 4.
Mwomwo ika chapwila chachilemu kumona vyuma mujila yamwaza?
Vatu vamwe veji kwambanga ngwavo: “Kachi nge wapwa uwamwaza, kaha watela kusolola kuwaha chove.” Mujimbu waAPA wahanjikile ngwawo, muvisemwa muze vakwechi vishinganyeka kanevi, vasanda navanyike vamapwevo veji kuputukanga kushinganyeka “nge kala mutu mwavamona nahase kuvazanga . . . , hakumona omu vali nakusoloka kanawa.” Vishinganyeka kana vinahase kuneha ponde. Vinanehe ukalu waunene kuchiyoyelo nakukulikangula chavatu. Mujimbu waAPA, wahanjika ngwawo “ukalu kana unahase kulingisa mutu ahombe.” Ukalu kana unahase nawa kulingisa mutu alizakaminenga “nakulihunga ivene . . . , nakulya chikuma chipwe kungenja, nakulimona nge wamokomoko, nakupwa wakuhomba.”
“Fumisa vyuma vili nakukuyanjisa mumuchima wove, kinga mujimba wove kuvyuma vyavipi. Mwomwo ukweze namyaka yaukweze vinapu vyaufwefwelekete.”—Muka-kwambulula 11:10.
Vyuma muka navisolola nge munakushinganyeka mwamangana?
Mbimbiliya yasolola nge “kushinganyeka mwamangana,” chatambukila hamwe nakavumbi. (WaChimoteu 1, 2:9) Vatu vakavumbi kavalitukwojolako, nakushinganyeka kaha hakusoloka chavoko, oloze veji kulimonanga mujila yamwaza. Vavumbika nawa vishinganyeka vyavakwavo ngocho veji kuvazanga kuli vakwavo, nakuvavumbika, kaha chachinenenyi veji kuvevwilanga uselewa kuli Kalunga. (Mika 6:8) Vatu kana veji kupwanga namasepa vamwenemwene nakukunyula vatu vakulimbata navo vaze kavatala kaha hakuwaha chamutuko, oloze namuchima wamutu, nakukapwa vakuwahilila muulo wavo.
Evi vikiko Mbimbiliya yatulwezela tuhakenga mangana kumutu wamukachi uze “wakusweka wamumuchima.” (WaPetulu 1, 3:3, 4) Mwomwo kuwaha chamumuchima kachakumako, oloze cheji kuwahilangako lika mukuhita chalwola. Mukanda waVishimo 16:31 wamba ngwawo, “Jivwi jinapu muchama wamwaza, kachi nge mutu mwajiwana mujila yakwoloka.” Ngocho, vatu vaze veji kukavangizanga jishimbi jamuMbimbiliya numba vapwa vanyike chipwe vakulwane veji kutachikizanga kuwaha chamwenemwene kaha nawa veji kuvavumbikanga kuli vakwavo nakupwa vakusuuluka nasolokeso yavo.
“Solokeso yamwaza yinahase kwonga, kaha kuwaha kacheshi kwililako, oloze pwevo uze amwivwa Yehova woma navamwalisanga.”—Vishimo 31:30.