KUNYIMA vatu vashinganyekelenga ngwavo tujila vavuluka ngwavo arctic terns veji kutukanga tunda yajikilomita 35,200 kufuma kungalila yaArctic nakuya kuAntarctica nakukinduluka cheka. Oloze kuhehwojola chakalinwomu chinasolola nge ava tujila veji kutukanga tunda yakuzomboka 35,200.

Tujila vavavulu vavahakilenga tumakina vavuluka ngwavo geolocators. Tumakina kana twapwile twatulelu ngana mwalipapilo. Etu tumakina twasolola nge tujila kana veji kutukanga tunda yakuheta kujikilomita 90,000, tunda yayisuku chikuma yize kavahasa kutuka tujila vekako. Chakutalilaho kajila umwe hali ava tujila atukile tunda yajikilomita kafwe 96,000. Mwomwo ika tunda kana yasuwililile ngana?

Ava tujila veji kulikondanga hakutuka chamokomoko nokwo navaputukila kutuka. Nganomu unasolola muvwimbimbi, ou kajila eji kutukanga mukulikonda hakuya kukalungalwiji wamunene. Mwomwo ika? Mwomwo eji kukavangizanga muze yinakuya peho.

Hamyaka kafwe 30 veji kutwamanga, ava tujila vanahase kutuka jikilomita jakuzomboka hajimiliyoni 2.4. Tunda kana munahase kuyesekesa kutunda yakuya hakakweji mapapa kawana. Muka-kuhehwojola umwe ambile ngwenyi: “Chuma kana chapwa chakukomwesa chikuma hakumona kajila wamupululu chikuma uze alema jingalamu 100 mwatuka tunda yayisuku ngana.” Kaha nawa ava tujila veji kutukilanga kuchihela kuze kunazumu, kumututuko chipwe kumulauko. Mukanda waLife on Earth: A Natural History wamba ngwawo: “Ava tujila veji kumonanga musana mwaka himwaka kuhambakana tujila veka.”