LIJINA lyamwaza chipwe puho yamwaza, vyapwa vyavilemu chikuma, kahechi chikiko chalingisa mumafuchi amwe vafwile kukinga mutu uze akwechi lijina chipwe puho yamwaza. Veji kumukinganga kuvyuma vyakufwana nge makuli (aze vanahase kuhanjika vatu chipwe kusoneka chipwe kuhanjika hapeho). Chuma kana chinatwanukisa mazu vasonekele kushikulu akwamba ngwavo: “Lijina lyamwaza linawahe kuhambakana luheto lwaluvulu. Kukuvumbika chinawahe kuhambakana palata naulu.” (Vishimo 22:1) Uno tunahase kutunga ngachilihi lijina lyamwaza, nakulingisa vatu vatuvumbike? Chuma chachilemu chinahase kutukafwa shina Mbimbiliya.

Chakutalilaho, achishinganyekenu hamazu atwama muMbimbiliya hali Samu 15. Mukapetulu kana vakumbulula chihula chakwamba ngwavo, “Iya nahase kupwa ngeji mumbalaka [yaKalunga]?” Muka-kwimba jisamu asonekele ngwenyi: “Shina ou eji . . . kulinganga vyuma vyakwoloka, ou nawa eji kuhanjikanga muchano mumuchima wenyi. Keshi kuvangila vakwavo. . . , Keshi kulinga vyuma vyavipi kuvakwavoko, kaha keshi kusaula masepa jenyiko. Eji kukananga vipapwoki vosena. . . Eji kulinganga vyuma nashiki, numba nge vyuma vinamukaluhwila. . . . Keshi kutambula maswekeza.” (Samu 15:1-5) Kutala kamweshi kuhasa kuvumbika mutu uze mwakavangiza jindongi kaneji jamwazako tahi?

Chuma chikwavo chinahase kulingisa mutu vamuvumbike shina kulinyisa. Mukanda waVishimo 15:33 wamba ngwavo: “Kulinyisa cheji kunehanga ulemu.” Chakutalilaho: Mutu wakulinyisa eji kulikekesa amone haze atela kuzachila, kaha eji kuzatanga nangolo mangana atesemo chuma kana. Kaha nawa mutu kana eji kulikonekelanga kachi nge nevwisa kupihya mukwavo. (WaYakova 3:2) Mutu wakulivwimba keshi kulinga vyuma kanako, oloze eji kufwilanga kaha kuwanyina vakwavo milonga. Mukanda waVishimo 16:18 wamba ngwavo: “Kulivwimba cheji kutwalanga kukulimbuka, kaha muchima wakulitohwesa weji kuhukanyisanga mutu.”

Vyuma muka namulinga kachi nge mutu mwahanjika vyuma vyavipi hali yenu? Kutala mwatela kupihilila chikuma nakupwa namatoto tahi? Lihulisenu ngwenu, ‘Kachi nge nangufwila kukinga lijina lyami, kutala nangutandakanyisa makuli kana tahi?’ Numba tuhu lwola lumwe chapwa chakutamo kutwala vihande vyangana kujizango, oloze Mbimbiliya yatuhuhumuna ngwayo: “Kanda mulusuka kutwala chihande kuzangoko.” Oloze “Shimutwila chihande chove namukwenu.” (Vishimo 25:8, 9) * Kachi nge namukumisa chihande chenu mujila yakuunda, kamweshi kuya kujizango nakwenyeka jimbongo jenuko.

Mbimbiliya kawapwa kaha mukanda wamukwitavako, oloze wapwa nawa himukanda wakukafwa vatu mukuyoya. Vatu vosena vaze veji kuzachisanga chinyingi chatwamamo veji kuvavumbikanga kuvatu nakutunga nawa lijina lyamwaza.