Kakavulu vaka-kulimbata veji kumonanga ukalu waunene nge vana vavo vanakolo nakufuma hembo. Halwola kana visemi veji kwivwanga nge vanajimbala. Mutu alinangula vyajitanga M. Gary Neuman ambile ngwenyi: “Ngweji kukafwanga vaka-kulimbata vaze kavazanga kuzachila hamwe navaka-mahyavoko. Echi cheji kuvalingisanga vahone kupwa vakukasunuka kuhanjika navaka-mahyavo nge vana vavo vanafumu hembo.” *

Uno omu mukiko wapwa naulo wenu tahi? Nge mukiko, kaha kuli vyuma vimwe vize vinahase kumikafwa. Chatete, tuchitalenu havyuma vimwe vize vinakumilingisa muhone kuzachilanga hamwe navaka-mahyenu.

Hamyaka yayivulu munahakenga chikuma mangana kuvana. Mumalo amavulu, visemi vashinganyeka ngwavo chapwa chakutamo kuhaka kulutwe vyuma vasaka vana vavo kuhambakana kuzakama ulo wavo. Hakulinga ngocho cheji kuvalingisanga vahake kaha mangana kumulimo wakulela vana nakuvalingisa jino vahone kuzakama vaka-mahyavo. Kakavulu ukalu kana weji kusolokanga chikumanyi nge vana vanafumu lyehi hembo. Pwevo umwe wamyaka yakusemuka 59 ambile ngwenyi: “Omu vana vetu vapwile hembo, twazachilenga milimo hamwe mwatanga. Oloze omu vana vafumine hembo, vyuma jino vyalumukile.” Lwola lumwe ou pwevo alwezele lunga lyenyi ngwenyi: “Ove nayami katweshi nakuzachila hamweko.”

Vaka-kulimbata vamwe cheji kuvakaluhwilanga kutwama ukawavo nge vana vanafumu hembo. Mukanda waEmpty Nesting wamba ngwavo, “Vaka-kulimbata vavavulu veji kusolokanga kwijiva nge hakiko vanalimbate.” Nge vaka-kulimbata navashinganyeka ngwavo kavazanga vyuma vyovimweko, kaha chinahase kuvalingisa vahone kulizakama nakutwama jino nge vasepa namutu vaze vatwama mukapete kamwe keshi nge vatu vaze valimbatako.

Chamokomoko naukalu kanou, munahase kuuhonesa nakulivwisa kuwaha kutwama hamwe chakuhona vana. Mbimbiliya yinahase kumikafwa. Mujila muka?

Itavilenu vyuma nge vinalumuka. Mbimbiliya yahanjika kutalisa kuli vana vakukola ngwayo: “Lunga mwakaseza ise nanaye.” (Kuputuka 2:24) Ngocho hakupwa muvisemi mwapwile namulimo wakunangula vana venu nakuvakafwa vapwenga nauhashi uze naukavakafwa nge vanakolo. Ngocho kumona vyuma mujila kaneyi, chatela kumilingisa muwahilile nge vana venu vanafumu hembo.—Lushimbi lwamuMbimbiliya: Mako 10:7.

Chipwe ngocho, namutwalaho lika kupwa muvisemi javaze vana. Halwola kana kamweshi cheka kuhasa kuvalweza vyakulingako, oloze namupwa jino muvaka-kuvakafwa. Nge vana vanafumu hembo nachimikafwa mutunge usoko wakukola navakiko oku nawa muli nakuzakama chikuma muka-mahyenu. *—Lushimbi lwamuMbimbiliya: Mateu 19:6.

Lwezenunga vaka-mahyenu vyuma munakushinganyeka. Lwezenu muka-mahyenu omu munakwivwa hakutwama chakuzeneka vana, nakufwila kwivwilila kanawa omu mwahanjika. Pwenunga namuchima wakutalilila chikoki nakwivwishisa kanawa vyuma mwahanjika mukwenu. Chinahase kumbata lwola numba muzamise ulo wenu namuka-mahyenu, oloze kulinga ngocho nachimikafwa chikuma.—Lushimbi lwamuMbimbiliya: Wavaka-Kolinde 1, 13:4.

Zachilenunga hamwe. Hanjikenu havyuma vize munakufwila kutesamo chipwe vize namusaka kulingila hamwe muvosena. Hakuwana nge munalelenga vana, ngocho muli nachinyingi chachivulu. Zachisenu chinyingi kana mangana mukafwe vakwenu.—Lushimbi lwamuMbimbiliya: Yopa 12:12.

Zamisenu cheka ulo wenu. Shinganyekenu havyuma vyamwaza vize mwazangile chikuma muli muka-mahyenu. Shinganyekenu nawa havyuma munalivwisanga kuwaha nahaukalu uze munahichimo. Kulinga ngocho nachimikafwa mulivwise kuwaha kuyoya chakuzeneka vana. Kachi nge namuzachilanga hamwe, kaha namuzamisa ulo wenu nakumilingisa nawa mulizange chikuma ngana muze mwalizangile hakavanga.