KUHEHWOJOLA chimwe chapwile mu 2015 mumafuchi 8 chasolwele nge vatu vavavulu veji kuchiwananga kupwa chachikalu kuwana lwola lwakuzata milimo yavo namilimo yeka yahembo. Ukalu kanou wejilenga mwomwo yavyuma vyakufwana nge kuvula chamilimo chipwe vikilikita vyeka vyahembo, nakufwila chikuma jimbongo, nakuzata jola jajivulu kumilimo. Chakutalilaho, mulifuchi lyaUnited States vaka-milimo veji kuzatanga jola 47 muchalumingo. Oloze vatu vamwe veji kuzatanga jola 60 nakuzombokaho.

Kuhehwojola chikwavo chize chapwile mumafuchi 36, vatu vamwe vahanjikile ngwavo kakavulu vevwilenga nge vanakashiwa nahalwola luze valihizumwinenga. Vana navakiko vanahase kwivwa nge vanakashiwa kachi nge namuvahana milimo yayivulu yakuzata.

Nge natufwila kuzata milimo yayivulu chikuma yize katweshi kuhasa kuzata halwola lumweko, kaha tunahase kuhomba. Kutala chapwa chachashi kukekesa kanawa vyuma tahi? Uno vyuma twafwelela, navize tweji kusakulanga, navize twafwila kulinga vyeji kutukafwanga ngachilihi? Chatete, tushimutwilenu havyuma viwana vize vyeji kulingisanga vatu vamwe vafwile kulivulishila vyakulinga.

Chisemi umwe walijina lyaGary ambile ngwenyi: “Ngwazachilenga makumbi 7 muchalumingo. Ngwalingilenga ngocho mwomwo yakusaka kuhana vana vami vyuma vyamwaza, kaha nawa ngwasakile kuvahana vyuma vize kangwapwilenga navyo yamiko.” Numba tuhu visemi veji kujinanga vyuma mwamwaza, oloze vatela kutachikiza vyuma vyavilemu mukuyoya chavo. Vaka-kulinangula vamwe vamba ngwavo, vakulwane navanyike vaze vamona jimbongo navyuma vyamukuyoya kupwa vyavilemu chikuma kavapwa vakuwahilila, nakusuuluka mukuyoya chavo, kaha nawa kavapwa vakulikangula kumijimba hakuvesekesa kuli vaze kavafwila vyuma kanako.

Hakusaka visemi vamwe vawahise chiyoyelo chavana vavo chakulutwe, vanalivulishilanga milimo yayivulu hamwe kaha navana vavo. Mukanda waPutting Family First wamba ngwavo, “visemi vaze veji kufwilanga kuzakama jitanga javo mujila kaneyi veji kuyandanga hamwe kaha navana vavo.”

Vaka-kukulisa vyuma veji kufwila kutukunyula mangana tushinganyeke ngwetu nge katweshi kulanda vyuma vyavoko kaha katweshi kusuuluka mukuyoya chetuko. Mangazini yaEconomist yambile ngwayo: “Kuvula chavyuma vyakulandulula chili nakwenyekela chikuma vatu lwola lwavo. Kusakula vyuma watela kulanda, chipwe kulya navize watela kutala mulwola lwalundende nachikiko chili nakukaluhwa.

Mumwaka wa 1930, mutu alinangula chikuma vyakusekasana ambile ngwenyi kuzovoloka chamakina chinakulingisa vaka-milimo vapwenga nalwola lwaluvulu lwakulihizumuna. Vyuma ahanjikile ou lunga vyapwile vyamakuli. Elizabeth Kolbert, muka-kusoneka mangazini yaNew Yorker ambile ngwenyi: “Muchishishisa chakukotokanga washi kumilimo, vatu vanakutonda vyuma vyavihya vize vinakuvenyekela chikuma jimbongo nalwola lwavo.”

Vaka-kuzata vamwe vanazatenga jola jajivulu mangana vevwise vakulwane javo vamilimo kuwaha. Kaha vatu kanava vanahase kumilingisa nayenu muputuke kulihana milonga enu vavene mwomwo yakuhona kuzata jola jajivulu nge muze vanakuzata vakiko. Kukaluhwa chajimbongo, chinalingisa vatu vavavulu vazate jola jajivulu mwomwo yakusaka kupwa najimbongo jajivulu.

Visemi vavavulu vanafwila kulondezeza visemi vamujitanga jimwe mangana navakiko  vapwenga najimbongo jajivulu. Nge kaveshi kulondezeza vakwavoko, kaha vanahase kwivwa nge kaveshi nakuzakama kanawa vana vavoko.

Tim uze atwama mulifuchi lyaUnited States ambile ngwenyi: “Ngwazangile chikuma milimo yami, kaha ngwayizachilenga nangolo shimbu yosena. Kaha ngwafwilililenga vatu vangutachikize.”

Ngana mwaTim, vatu vavavulu veji kufwila chikuma ulemu hamwe kaha namilimo yavo veji kuzatanga. Vyuma muka vinafumumo? Elizabeth Kolbert uze twavulukanga hakavanga ambile ngwenyi: “Kuzata chikuma nangolo cheji kulingisanga mutu ayenga chikuma fuma. Nge naukilikita chikuma milimo, kaha naupwa uwamulemu chikuma.”

Mbimbiliya yakolezeza vatu vazatenga chikuma nangolo. (Vishimo 13:4) Echi chasakiwa kukekesa kanawa vyuma. Mukanda waMuka-kwambulula 4:6 wamba ngwawo: “Kunokako chindende chinawahe kuhambakana kukilikita chikuma nakuhangasana peho.”

Kukekesa kanawa vyuma mukuyoya cheji kukafwanga mutu apwenga wakulikangula muvishinganyeka nakumujimba. Uno chapwa chachashi kukehesako milimo tahi? Eyo. Tushimutwilenu hajijila jiwana jize najitukafwa kulinga ngocho:

Chapwa chakwoloka kufwila kupwa najimbongo jakulikafwa najo. Uno jimbongo jingahi jasakiwa numba vatu vasuuluke? Vyuma muka vyeji kulingisanga vatu vafukile? Uno kufukila vachimwena hajimbongo eji kutambulanga mutu tahi nyi havikumba atwama navyo? Chikupu vene, kupwa nalwola lwaluvulu lwakunoka chipwe lwakulihizumuna chinahase kulingisa vatu vamone nge kaveshi nalwola lwaluvulu lwakulinga vyumako.

Tim uze twavulukanga hakavanga ambile ngwenyi: “Ami napuwami twakekesele kanawa hachiyoyelo chetu nakufwila kuchashiwisa. Twasonekele vyuma twapwile nakulinga navize twalitomenene kutesamo. Twashimutwilile vyuma vyasolokele havyuma twalingile kunyima navyuma vize twatelele kulinga mangana tutesemo vyuma tuli nakufwila.”

Mbimbiliya yatulweza tulihende ‘kukufwila chameso.’ (WaYowano 1, 2:15-17) Vaka-kukulisa vyuma vanahase kulingisa mutu afwile kulanda kala vyuma mwamona, kahechi chinahase kulingisa mutu kana azate jola jajivulu mwomwo yakufwila vyuma namono chipwe kufwila kulihizumuna chize nachimwenyekela jimbongo jajivulu. Kaha nawa kamweshi kuhasa kulihenda kuvyuma vyosena vize namumonako. Oloze kamwatela kuhakanga mangana chikuma kuvyuma kanako. Kaha nawa mwatela kukekesa kanawa vyuma vize munakusaka chikuma.

Mwatela nawa kukekesa kanawa vilinga vyamasepa jenu vaze mweji kulikatanga navo. Nge namumona masepa jenu vali nakufwila chikuma vyuma vyamukuyoya chipwe nge veji kumonanga ngwavo kufukila cheji kwizanga mwomwo yavyuma kanevi, kaha mwatela kutondako masepa veka vavilinga vyamwaza. Mbimbiliya yamba ngwayo: “Ou mwatambuka navaka-mangana mwakapwa muka-mangana.”—Vishimo 13:20.

Shimutwilenu namukulwane wenu wamilimo nakumulweza vyuma mwafwila, kaha kamwatela kwivwa kupihya hakushinganyeka ngwenu milimo nayikumako.  Mukanda waWork to Live wamba ngwawo: “Vatu vaze veji kuzachisanga kanawa lwola lwakuzata milimo, navyuma vyeka vyahembo chipwe kutambulako makumbi akunoka veji kupwanga vakulihehwa.”

Gary uze twavulukanga hakavanga apwile najimbongo jajivulu, ngocho asakile kuzatanga jola jajindende kaha. Ambile ngwenyi: “Ashimutwilile natanga yenyi valumuneko chiyoyelo chavo.” Ahanjikile cheka ngwenyi: “Twesekele vene kulinga ngocho. kaha nawa ngwalwezele mukulwane wami wamilimo ngwami nguli nakusaka kuzata makumbi amandende muchalumingo, kaha etavilile.”

Malunga namapwevo vaze valimbata vatela kuwanangako lwola lwakupwanga hamwe, kaha vana nawa vasakiwa kupwa navisemi javo. Ngocho kamwatela kwesekesanga tanga yenu kutanga yize yalivulishila vyakulingako. Gary ahanjikile ngwenyi: “Tanga yatela kuwanangako lwola lwakunoka nakulihizumuna hamwe nakuhona kwenyekela lwola kuvyuma vize kavyapwa vyavilemuko.”

Nge muli hamwe natanga, kamwatela kwechelelanga chisaji chamivwimbimbi, najishinga, navyuma vyeka vimitangule kushimutwilako. Mwatela kulilanga hamwe vyakulya nakuzachisa lwola kana hakushimutwila natanga yenu. Nge visemi navalinga ngocho kaha vana vavo navapwa vakusuuluka kaha nawa kushikola navalinga kanawa.

Jino lihulisenu ngwenu: ‘Vyuma muka ngwamona kupwa vyavilemu mukuyoya chami? Vyuma muka ngwasaka kulingila tanga yami?’ Nge mwasaka kupwa vakuwahilila nakusuuluka mutanga yenu, kaha mwatela kusakula vyuma vyavilemu vize navisolola nge mwatwama nachinyingi chamuMbimbiliya.