Mutu eji kupwanga mucheseko kachi nge nakunyuka kuvyuma vimwe chikumanyi vyuma vyavipi. Chakutalilaho, achishinganyekenu muli muchitanda, kaha hinamumona chuma chamwaza. Vishinganyeka vinahase kumilweza nge munahase tuhu kwiva chuma kana chakuzeneka kumikwata. Oloze chivezu chenu nachimikanyisa. Kaha namufwila vene kukavangiza chivezu chenu. Halwola kana cheseko chinakumu mwomwo munachifungulula.

VYUMA YAHANJIKA MBIMBILIYA

Kupwa mucheseko kachalingisa mutu apwenga wamokomokoko. Mbimbiliya yasolola nge tuvosena tweji kupwanga muvyeseko. (Wavaka-Kolinde 1, 10:13) Oloze chuma chachilemu shina vyuma tweji kulinganga kachi nge tuli mucheseko. Vatu vamwe veji kushinganyekanga chikuma havyuma vyakuhenga, kaha kutwala muze veji kulimbenjanga. Kaha veka veji kulitwaminanga kushinganyeka vyuma kana hahaze vene.

“Mutu himutu eji kupwanga mucheseko omu kufwila chamumuchima wenyi ivene nachimwonga nakumuzondola.”—WaYakova 1:14.

Mbimbiliya yasolola vyuma vize vinahase kutulingisa tulinge vyuma vyavipi. Mukanda WaYakova 1:15 wamba ngwawo: “Kufwila kana omu nachimita, cheji kusemanga shili.” Chakutalilaho nge natushinganyeka chikuma havyuma vyavipi, kaha katweshi kuhasa kulikanyisa kulinga vyuma kana ngana mwapwevo uze keshi kuhasa kulikanyisa kusapulukako. Chipwe ngocho tunahase kuhonesa vishinganyeka vyavipi. Tunahase chikupu kuvihonesa.

OMU MBIMBILIYA YINAHASE KUMIKAFWA

Ngana muze chapwa chachashi kupwa navishinganyeka vyavipi, ngocho chinahase nawa kupwa chachashi kuhonesa vishinganyeka kana. Mujila kana? Vyuma vinahase kutukafwa shina kupwangako namilimo yimwe yakuzata, nakupwanga nalwola lwakushimutwilanga namasepa jetu chipwe kushinganyekanga havyuma vyamwaza. (Wavaka-Fwilipi 4:8) Chuma chikwavo chinahase kutukafwa shina kushinganyeka haukalu unahase kwiza mwomwo yakwechelela vyeseko, ukalu wakufwana nge kuzeya muvishinganyeka, nakumujimba nakushipilitu. (Lushimbi lwamuchivali 32:29) Kulomba nawa chinahase kutukafwa chikuma. Yesu kulishitu ambile ngwenyi: “Lombenunga lika kuchina namwingila mucheseko.”—Mateu 26:41.

“Kanda navamihungumwisako: Kalunga kaveshi kumuhulamisako. Mwomwo vyeshovyo ali nakukuva mutu, vikiko vene mwakaha nawa.”—Wavaka-Ngalesha 6:7.

VYUMA VILI NAKUSOLOKA

Vyeseko vyapwa muheto chipwe ndulo vize vinahase kuhaka mutu wakuzeneka chinyingi, chipwe wakuhona mangana muponde. (WaYakova 1:14, kwinyikila chamwishi) Chikumanyi vyeseko vyakufwana nge ujila vize vinahase kuneha ukalu waunene.—Vishimo 7:22, 23.

OMU MBIMBILIYA YINAHASE KUMIKAFWA

Yesu Kulishitu ambile ngwenyi: “Jino kachi nge liso lyove lyachilyo lili nakukuhukanyisa, litombongonyemo nakulimbila.” (Mateu 5:29) Yesu kapwile nakutalisa kuliso liveneko, oloze apwile nakulumbununa ngwenyi nge tuli nakusaka kwivwisa Kalunga kuwaha nakukapwa nakuyoya chahaya myaka yosena, kaha twatela kujiha vilyo vyetu vyamujimba mujila yachifwanyisa kutalisa kuvilinga vyavipi. (Wavaka-Kolose 3:5) Echi chasakiwa kuzata nangolo mangana tuhonese vyeseko. Ngamba yaKalunga umwe wakushishika alombele ngwenyi: “Talisa meso ami kweka mangana nguzeneke kutala vyuma vyamokomoko.”—Samu 119:37.

Kupwa namuchima wakulikanyisa chinahase kupwa chachikalu. Chapwa ngocho mwomwo ‘mujimba weji kuzeyanga.’ (Mateu 26:41) Echi chikiko cheji kutulingisanga tulimbenje. Kachi nge tweji kwivwanga kupihya nge tunalingi vyuma vyavipi nakuzata nangolo tulihende kuvilinga kana, kaha Tengi yetu Yehova Kalunga mwatwivwila ‘keke nakututetela.’ (Samu 103:8) Chikupu vene chuma kana cheji kutukolezezanga.

“Ove Ya, kachi nge weji kulamanga jishili, Ove Yehova, kachi iya mwemana kumeso ove?”—Samu 130:3.